لاہور: بائیک رائیڈر کی مبینہ ہراسانی، لڑکی نے چلتی موٹرسائیکل سے چھلانگ لگا دی

لاہور: صوبائی دارالحکومت لاہور کے علاقے جوہر ٹاؤن میں آن لائن بائیک رائیڈر کی مبینہ ہراسانی سے بچنے کے لیے لڑکی نے چلتی موٹرسائیکل سے چھلانگ لگا دی۔ پولیس نے کارروائی کرتے ہوئے ملزم کو گرفتار کرلیا اور اس کے خلاف مقدمہ درج کرکے مزید تفتیش شروع کردی ہے۔

پولیس کے مطابق جوہر ٹاؤن میں نجی ٹیکسی کمپنی سے وابستہ موٹرسائیکل سوار نے دورانِ سفر لڑکی کو مبینہ طور پر ہراساں کرنے کی کوشش کی۔ بائیک رائیڈر کی مبینہ نازیبا حرکات سے خوفزدہ ہوکر لڑکی نے خود کو محفوظ بنانے کے لیے چلتی موٹرسائیکل سے چھلانگ لگا دی۔

واقعے کے بعد پولیس نے ملزم کی گرفتاری کے لیے کارروائی کی۔ پولیس حکام کا کہنا ہے کہ پیشہ ورانہ مہارت اور ہیومن انٹیلیجنس کی مدد سے ملزم کو فوری طور پر گرفتار کرلیا گیا۔

پولیس نے ملزم کے خلاف مقدمہ درج کرلیا ہے جبکہ واقعے کے تمام پہلوؤں کا جائزہ لینے کے لیے مزید تفتیش جاری ہے۔

واقعے نے آن لائن سفری سہولیات استعمال کرنے والی خواتین کے تحفظ اور دورانِ سفر ہراسانی کی روک تھام سے متعلق سوالات کو ایک بار پھر اہم بنا دیا ہے۔