بشریٰ انصاری کا بوٹوکس سے چہرہ خراب ہونے کا انکشاف، دو ماہ گھر میں رہیں

کراچی: پاکستان کی سینئر اداکارہ بشریٰ انصاری نے انکشاف کیا ہے کہ کئی سال قبل آنکھوں کے گرد بوٹوکس کروانے کے بعد انہیں چہرے سے متعلق سنگین مسائل کا سامنا کرنا پڑا، جس کے باعث وہ خوفزدہ ہوگئی تھیں اور تقریباً دو ماہ تک گھر سے باہر نہیں نکلیں۔

حال ہی میں ایک انٹرویو کے دوران بشریٰ انصاری نے جلد کی دیکھ بھال اور بوٹوکس کے اپنے تجربے کے بارے میں گفتگو کی۔

اداکارہ کے مطابق انہوں نے 10 سے 12 سال قبل آنکھ کے گرد بوٹوکس کروایا تھا، تاہم ان کے بقول مناسب رہنمائی نہ ملنے کے باعث پیچیدگیاں پیدا ہوئیں۔ انہوں نے بتایا کہ متاثرہ جانب کروٹ لے کر سونے کے پانچ سے چھ روز بعد ان کے چہرے میں تبدیلیاں محسوس ہونے لگیں، آنکھیں متاثر ہوئیں اور ہونٹوں کی شکل بھی بدل گئی۔

بشریٰ انصاری نے بتایا کہ چہرے کی حالت دیکھ کر وہ خوفزدہ ہوگئی تھیں اور انہیں خدشہ ہونے لگا تھا کہ کہیں انہیں فالج تو نہیں ہوگیا۔ انہوں نے تقریباً دو ماہ تک اپنا چہرہ لوگوں کو دکھانے سے گریز کیا اور گھر میں رہیں۔

اداکارہ کے مطابق جب انہوں نے متعلقہ ڈاکٹر سے رابطہ کیا تو انہیں اپنے خدشات کو وہم قرار دیے جانے پر مایوسی ہوئی۔ بعدازاں دوسرے ڈاکٹر سے مشورہ کرنے پر انہیں اپنے مسئلے کے بارے میں مزید وضاحت ملی۔

بشریٰ انصاری نے زور دیا کہ ڈاکٹرز کو چاہیے کہ کاسمیٹک طریقۂ علاج کے بعد کسی مسئلے کا سامنا کرنے والے مریضوں کی بات توجہ سے سنیں، انہیں درست معلومات فراہم کریں اور تسلی کے ساتھ ان کی رہنمائی کریں۔