ماؤ زے تنگ سے متعلق تبصرہ، ایمباپے نے چینی عوام سے معافی مانگ لی

پیرس: فرانس کے معروف فٹبال اسٹار کائلین ایمباپے کو چین کے سابق رہنما ماؤ زے تنگ سے متعلق سوشل میڈیا میمز پر تبصرے کے بعد معذرت کرنا پڑگئی۔ رپورٹس کے مطابق ان کے بیان کے بعد دو چینی کمپنیوں نے بھی ان کے ساتھ معاہدے ختم کردیے۔

میڈیا رپورٹس کے مطابق ایمباپے سے فرانسیسی ٹاک شو ’دی برج‘ میں انٹرنیٹ پر وائرل ہونے والی ان میمز کے بارے میں سوال کیا گیا تھا، جن میں ان کے چہرے کو ماؤ زے تنگ کی تصاویر پر ایڈٹ کرکے دکھایا گیا تھا۔

ایمباپے نے گفتگو کے دوران بتایا تھا کہ ایک ویڈیو دیکھ کر انہیں ہنسی آئی، جس میں ان کا موازنہ چین کے سابق رہنما سے کیا گیا تھا۔

دو چینی کمپنیوں نے معاہدے ختم کردیے

ایمباپے کے اس تبصرے کے بعد چینی مشروبات بنانے والی ایک کمپنی اور ڈیری مصنوعات تیار کرنے والی ایک کمپنی کی جانب سے ان کے ساتھ تجارتی معاہدے ختم کیے جانے کی اطلاعات سامنے آئیں۔

اس پیش رفت کے بعد فٹبال اسٹار نے اپنے بیان پر وضاحت پیش کرتے ہوئے معذرت کی۔

ایمباپے کا چینی عوام سے اظہارِ معذرت

ایمباپے نے اپنے بیان میں کہا کہ حالیہ انٹرویو کے دوران اپنی تصویر پر ردِعمل دیتے ہوئے ان سے نامناسب تبصرہ ہوا، جس سے چین اور دنیا بھر میں چینی برادری سے تعلق رکھنے والے متعدد افراد کے جذبات مجروح ہوئے۔

انہوں نے کہا کہ کسی کی دل آزاری کرنا ان کا مقصد نہیں تھا اور وہ اپنے الفاظ سے متاثر ہونے والے تمام افراد سے معذرت خواہ ہیں۔

فرانسیسی فٹبالر نے چینی عوام اور ان کی تاریخ کے لیے احترام کا اظہار کرتے ہوئے اپنے بیان پر افسوس بھی ظاہر کیا۔