پاکستانی ماڈل اسرا عائشہ خان نے اداکار زیب خان سے شادی کرلی

پاکستانی ماڈل اسرا عائشہ خان اور اداکار زیب خان رشتۂ ازدواج میں منسلک ہوگئے۔ رئیلیٹی شو سے شہرت حاصل کرنے والی اسرا عائشہ خان نے اپنے شو کے ساتھی کھلاڑی اور اداکار زیب خان سے شادی کرلی۔

جوڑے نے اپنے نکاح کی تصاویر سوشل میڈیا پلیٹ فارم انسٹاگرام پر شیئر کیں، جس کے بعد مداحوں کی جانب سے انہیں مبارک باد دینے کا سلسلہ شروع ہوگیا۔

نکاح کی تصاویر میں اسرا عائشہ خان سفید اور سنہری رنگ کے خوبصورت لباس میں دکھائی دیں۔ ماڈل نے اپنی شادی کے موقع پر ہلکے میک اپ اور نفیس جیولری کا انتخاب کیا، جس سے ان کی سادگی نمایاں رہی۔

دوسری جانب اداکار زیب خان سفید شلوار قمیض کے ساتھ جامنی اور نیلے رنگ کا کوٹ پہنے نظر آئے۔ دونوں کی تصاویر کو سوشل میڈیا صارفین کی جانب سے پسند کیا جا رہا ہے۔

اسرا عائشہ خان اور زیب خان کی شادی کی خبر سامنے آنے کے بعد مداحوں اور شوبز شخصیات کی جانب سے جوڑے کے لیے نیک تمناؤں اور مبارک باد کے پیغامات کا سلسلہ جاری ہے۔