جوڈیشل کمیشن نے ججز تقرری رولز میں ترامیم منظور کرلیں، ہائیکورٹس کیلئے 7 رکنی کمیٹی قائم

(اسلام آباد) چیف جسٹس پاکستان کی زیر صدارت جوڈیشل کمیشن آف پاکستان کا اہم اجلاس منعقد ہوا جس میں ججز کی تقرری، آئینی بینچوں کے انتخاب اور عدالتی انتظامی امور سے متعلق متعدد اہم فیصلے کیے گئے۔

اجلاس میں جوڈیشل کمیشن نے ججز کی تقرری سے متعلق رولز 2024 میں ترامیم کی منظوری دے دی جبکہ آئینی بینچوں کے لیے ججز کی نامزدگی اور انتخاب کے معیار کی بھی توثیق کر دی گئی۔

کمیشن کے اعلامیے کے مطابق آئینی بینچوں کے لیے ججز کے انتخاب کا طریقہ کار مزید واضح اور مؤثر بنایا گیا ہے تاکہ تقرری کے عمل میں شفافیت اور یکسانیت کو یقینی بنایا جا سکے۔

اجلاس میں ہائیکورٹ ججز کی کارکردگی جانچنے کے لیے مجوزہ جوڈیشل پرفارمنس ایویلیوایشن رولز 2026 پر فیصلہ مؤخر کر دیا گیا۔ اس حوالے سے تمام ہائیکورٹس کے چیف جسٹسز اور سینئر ججز سے سات روز کے اندر آراء طلب کر لی گئی ہیں۔

جوڈیشل کمیشن نے فیصلہ کیا کہ مجوزہ قواعد کو حتمی شکل دینے سے قبل مزید مشاورت کی جائے گی تاکہ تمام متعلقہ فریقین کی رائے کو مدنظر رکھا جا سکے۔

اجلاس کے دوران بلوچستان بار کونسل کی جانب سے نئی رول سازی کی تجویز بھی زیر غور آئی، تاہم کمیشن نے اسے مسترد کرتے ہوئے قرار دیا کہ بار کونسل کے نامزد رکن کی دو سالہ مدت آئین کے تحت مقرر ہے اور اس میں تبدیلی کی گنجائش موجود نہیں۔

کمیشن نے ایجنڈا آئٹمز نمبر ایک، تین اور چار کی منظوری بھی دی اور ہائیکورٹس میں ججز کی تقرری کے عمل کے لیے سات رکنی کمیٹی تشکیل دینے کا فیصلہ کیا۔ یہ کمیٹی امیدواروں کے انٹرویوز کرے گی اور اپنی سفارشات جوڈیشل کمیشن کو پیش کرے گی۔

اعلامیے کے مطابق کمیٹی کے سربراہ کا تقرر چیف جسٹس پاکستان کریں گے۔ اجلاس میں عدالتی نظام کی بہتری، تقرریوں کے طریقہ کار اور دیگر قانونی و انتظامی امور پر بھی تفصیلی غور کیا گیا۔