کوہاٹ پولیس لائنز پر خودکش حملے کے بعد کلیئرنس آپریشن مکمل، تمام دہشتگرد ہلاک

کوہاٹ: کوہاٹ پولیس لائنز پر خودکش حملے کے بعد جاری کلیئرنس آپریشن مکمل کرلیا گیا، سکیورٹی فورسز نے کارروائی کے دوران تمام دہشتگردوں کو ہلاک کردیا۔

حکام کے مطابق پولیس لائنز کی اسپیشل برانچ کی عمارت میں داخل ہونے والے دہشتگرد بھی مارے گئے ہیں۔ گزشتہ روز سے جاری کلیئرنس آپریشن میں ایلیٹ فورس کمانڈوز، سی ٹی ڈی اور سکیورٹی فورسز نے حصہ لیا۔

سی ٹی ڈی کے ایڈیشنل آئی جی نے آپریشن کی خود نگرانی کی۔ گزشتہ شب دہشتگردوں نے ایڈیشنل آئی جی سی ٹی ڈی پر دستی بم سے حملہ کیا تھا، جس کے نتیجے میں ان کے بازو پر زخم آیا۔ طبی امداد کے بعد انہوں نے دوبارہ آپریشن کی نگرانی شروع کردی۔

آئی جی خیبرپختونخوا ذوالفقار حمید کے مطابق پولیس اور سکیورٹی فورسز کی جوابی کارروائی میں 8 دہشتگرد ہلاک ہوئے جبکہ اہم عمارات کو کلیئر کرلیا گیا ہے۔

آئی جی خیبرپختونخوا نے بتایا کہ خودکش بمبار قانون کے محافظوں کو نشانہ بنانے کی کوشش میں ناکام رہا۔ انہوں نے کہا کہ ایڈیشنل آئی جی سی ٹی ڈی، آر پی او اور ڈی پی او نے آپریشن کی قیادت کی جبکہ جی او سی کوہاٹ بھی موقع پر موجود رہے۔

دوسری جانب خودکش حملے اور فائرنگ کے تبادلے میں شہید ہونے والے افراد کی تعداد 23 ہوگئی ہے، جن میں ایس پی، ڈی ایس پی اور انسپکٹر سمیت متعدد پولیس اہلکار شامل ہیں۔

آئی جی خیبرپختونخوا ذوالفقار حمید نے آپریشن میں حصہ لینے والے جوانوں کے لیے انعامات کا بھی اعلان کیا۔