وفاقی کابینہ کی نئے کرنسی نوٹوں کے ڈیزائن کی منظوری، 10 روپے کا نوٹ ختم کرکے سکہ متعارف کرانے کا فیصلہ

اسلام آباد: وفاقی کابینہ نے پاکستان میں کرنسی نوٹوں کے نئے ڈیزائن کی منظوری دے دی ہے، جبکہ 10 روپے کے بینک نوٹ کی جگہ 10 روپے کا سکہ متعارف کرانے کا فیصلہ بھی کیا گیا ہے۔

وزیراعظم ہاؤس سے جاری اعلامیے کے مطابق وزیراعظم شہباز شریف کی زیرِ صدارت وفاقی کابینہ کا اجلاس اسلام آباد میں منعقد ہوا، جس میں وزارتِ خزانہ کی سفارش پر نئے کرنسی نوٹوں کے ڈیزائن کی منظوری دی گئی۔

اجلاس کے دوران کابینہ کو نئے کرنسی نوٹوں کے ڈیزائن کے حوالے سے تفصیلی بریفنگ دی گئی۔ بتایا گیا کہ نئے نوٹوں کی تیاری کے لیے ملک بھر سے مصوروں اور ڈیزائنرز کی تجاویز طلب کی گئی تھیں۔

اعلامیے کے مطابق وزیراعظم کی جانب سے قائم کردہ کابینہ کمیٹی نے نئے کرنسی نوٹوں کے ڈیزائن کے معاملے پر تمام متعلقہ اسٹیک ہولڈرز سے تفصیلی مشاورت بھی کی۔

نئے کرنسی نوٹوں میں جعلی نوٹوں کی روک تھام کے لیے جدید سکیورٹی فیچرز شامل کیے جائیں گے، جبکہ ان کی تیاری میں ایسا جدید میٹریل استعمال کیا جائے گا جس سے نوٹوں کی پائیداری اور استعمال کی مدت میں اضافہ ہوسکے۔

وفاقی کابینہ نے 10 روپے کے موجودہ بینک نوٹ کی جگہ 10 روپے کا سکہ جاری کرنے کی منظوری بھی دے دی ہے۔

نئے کرنسی نوٹوں کے اجرا اور 10 روپے کے سکے کی گردش سے متعلق عملی اقدامات اور تفصیلات آئندہ مرحلے میں سامنے آنے کی توقع ہے۔