احتجاج سے قبل کاکروچ پارٹی کے سربراہ ابھیجیت دپکے گرفتار

نئی دہلی: بھارت کے دارالحکومت نئی دہلی میں ممکنہ احتجاج کے پیش نظر کاکروچ جنتا پارٹی کے سربراہ ابھیجیت دپکے کو گرفتار کر لیا گیا۔

بھارتی میڈیا رپورٹس کے مطابق احتجاج سے قبل نئی دہلی میں سیکیورٹی کے سخت انتظامات کیے گئے ہیں اور شہر کے مختلف علاقوں میں سیکیورٹی اہلکاروں کی بھاری نفری تعینات کر دی گئی ہے۔ جنتر منتر کی جانب جانے والی سڑکوں پر بھی رکاوٹیں کھڑی کر دی گئی ہیں۔

رپورٹس میں نئی دہلی میں موبائل انٹرنیٹ سروس معطل کیے جانے اور دہلی میٹرو کے 57 اسٹیشنوں کے داخلی و خارجی راستے بند کیے جانے کی اطلاعات بھی سامنے آئی ہیں۔ اس کے علاوہ 250 سے زائد ٹرینیں منسوخ کیے جانے کی بھی اطلاعات ہیں۔

احتجاج کرنے والے مظاہرین انتخابی اصلاحات متعارف کرانے اور چیف الیکشن کمشنر کے استعفے کا مطالبہ کر رہے ہیں۔ احتجاج کے خدشے کے پیش نظر دارالحکومت میں سیکیورٹی مزید سخت کر دی گئی ہے۔