چیف الیکشن کمشنر کی تقرری پر حکومت اور اپوزیشن میں مشاورت شروع، 27 ستمبر احتجاج کی تیاریوں کا جائزہ

چیف الیکشن کمشنر اور الیکشن کمیشن کے دو ارکان کی تقرری کے معاملے پر حکومت اور حزبِ اختلاف کے درمیان مشاورت کا آغاز ہوگیا ہے۔ ذرائع کے مطابق اپوزیشن لیڈر راجہ ناصر عباس کے چیمبر میں اپوزیشن رہنماؤں کا اہم اجلاس ہوا، جس میں محمود خان اچکزئی، بیرسٹر گوہر اور سلمان اکرم راجہ شریک ہوئے۔

اجلاس میں ملک کی سیاسی صورتحال، 27 ستمبر کے احتجاج اور آئندہ کی حکمت عملی پر تفصیلی مشاورت کی گئی۔ ذرائع کے مطابق پی ٹی آئی کو 27 ستمبر کے احتجاج کے لیے بھرپور تیاری کی ہدایت کی گئی ہے۔

اجلاس میں ملک کے بگڑتے ہوئے حالات کے پیش نظر تمام سیاسی جماعتوں سے رابطے کرکے آل پارٹیز کانفرنس (اے پی سی) بلانے کا فیصلہ بھی کیا گیا۔ 15 ستمبر کو تحریک تحفظ آئین کا اجلاس ہوگا، جس میں اے پی سی کی تیاریوں کا جائزہ لیا جائے گا۔

ذرائع کا کہنا ہے کہ اپوزیشن لیڈر نے وزیراعظم کے خط کا جواب دیتے ہوئے مشاورت کے لیے دن اور وقت مانگ لیا ہے۔ اپوزیشن رہنما محمود خان اچکزئی نے دیگر اپوزیشن رہنماؤں سے مشاورت کے بعد وزیراعظم کے خط کا جواب دیا۔