لوئر دیر میں سی ٹی ڈی اور پولیس کا بڑا آپریشن، 6 مطلوب دہشتگرد ہلاک

لوئر دیر میں کاؤنٹر ٹیررازم ڈیپارٹمنٹ (سی ٹی ڈی) اور پولیس نے مشترکہ کارروائی کرتے ہوئے 6 مطلوب دہشتگردوں کو ہلاک کر دیا، جو سکیورٹی فورسز پر حملوں اور ایک پولیس کانسٹیبل کی شہادت سمیت متعدد دہشتگردانہ سرگرمیوں میں ملوث تھے۔

سی ٹی ڈی کے ترجمان کے مطابق خفیہ اطلاع پر کی جانے والی کارروائی کے دوران دہشتگردوں کے ٹھکانوں کو نشانہ بنایا گیا، جہاں شدید فائرنگ کے تبادلے میں 6 دہشتگرد مارے گئے۔ آپریشن کے دوران دہشتگردوں کے قبضے سے 6 کلاشنکوفیں اور 3 دستی بم بھی برآمد کیے گئے۔

ترجمان نے بتایا کہ ہلاک دہشتگرد قانون نافذ کرنے والے اداروں کو مختلف مقدمات میں مطلوب تھے اور علاقے میں دہشت پھیلانے کی کارروائیوں میں سرگرم تھے۔

کامیاب آپریشن پر انسپکٹر جنرل پولیس خیبرپختونخوا اور ایڈیشنل آئی جی سی ٹی ڈی نے فورسز کی پیشہ ورانہ کارکردگی کو سراہتے ہوئے کہا کہ دہشت گردی کے مکمل خاتمے تک صوبے بھر میں انٹیلی جنس بیسڈ آپریشنز کا سلسلہ جاری رہے گا۔

سی ٹی ڈی حکام کے مطابق علاقے میں سرچ اور کلیئرنس آپریشن بھی جاری ہے تاکہ کسی ممکنہ خطرے یا دہشتگردوں کے سہولت کاروں کا سراغ لگایا جا سکے۔

دریں اثنا وفاقی وزیر داخلہ محسن نقوی نے لوئر دیر میں خوارجی عناصر کے خلاف کامیاب کارروائی پر خیبرپختونخوا سی ٹی ڈی اور پولیس کو خراج تحسین پیش کیا۔ انہوں نے کہا کہ بہادر اہلکاروں نے پیشہ ورانہ مہارت، جرات اور بروقت کارروائی کے ذریعے دہشتگردوں کے ناپاک عزائم کو ناکام بنایا۔

وزیر داخلہ کا کہنا تھا کہ قوم کو اپنے ان دلیر جوانوں پر فخر ہے جنہوں نے اپنی جانوں کو خطرے میں ڈال کر عوام کے جان و مال کا تحفظ یقینی بنایا اور علاقے کو بڑے نقصان سے بچایا۔