خیبر پختونخوا کے 37 مراکز صحت آؤٹ سورس کرنے کا فیصلہ، نجی شعبے سے درخواستیں طلب

پشاور: خیبر پختونخوا ہیلتھ فاؤنڈیشن نے صوبے کے 37 مراکز صحت کی مینجمنٹ اور آپریشنز پبلک پرائیویٹ پارٹنرشپ (PPP) کے تحت آؤٹ سورس کرنے کا فیصلہ کر لیا ہے۔

خیبر پختونخوا ہیلتھ فاؤنڈیشن کے مطابق مراکز صحت کی آؤٹ سورسنگ کا بنیادی مقصد صوبے میں صحت کی سہولیات کے معیار، عوام کی رسائی اور طبی خدمات کی کوریج کو بہتر بنانا ہے۔

اس منصوبے کے تحت اہل اور تجربہ کار فرموں، تنظیموں اور جوائنٹ وینچرز سے اظہارِ دلچسپی (Expression of Interest) کی درخواستیں طلب کی گئی ہیں۔ فاؤنڈیشن کے مطابق ہر صحت مرکز کو ایک الگ پراجیکٹ تصور کیا جائے گا۔

کن اضلاع کے مراکز صحت شامل ہیں؟

آؤٹ سورسنگ کے لیے شامل مراکز صحت خیبر پختونخوا کے مختلف اضلاع میں واقع ہیں۔ فہرست میں دیر لوئر، ہنگو، ہری پور، کرک، کوہاٹ، کرم، لکی مروت، اورکزئی، بونیر، پشاور اور سوات شامل ہیں۔

اس کے علاوہ شانگلہ، نوشہرہ، شمالی وزیرستان، مہمند، ڈیرہ اسماعیل خان اور بنوں کے مراکز صحت بھی اس منصوبے کا حصہ ہوں گے۔

امیدواروں کے لیے طریقہ کار

خیبر پختونخوا ہیلتھ فاؤنڈیشن نے واضح کیا ہے کہ منصوبے میں دلچسپی رکھنے والی اہل فرموں، تنظیموں اور جوائنٹ وینچرز کو مقررہ طریقہ کار کے مطابق درخواستیں جمع کرانا ہوں گی۔

فاؤنڈیشن کے مطابق خواہشمند امیدواروں کو فارم 4 کے تحت اپنی ترجیحات ظاہر کرنا ہوں گی، جبکہ ہر مرکز صحت کو الگ پراجیکٹ کے طور پر دیکھا جائے گا۔

فاؤنڈیشن کا کہنا ہے کہ پبلک پرائیویٹ پارٹنرشپ کے ذریعے مراکز صحت کی مینجمنٹ اور آپریشنز نجی شعبے کے حوالے کرنے کا مقصد صحت کی سہولیات کی کارکردگی اور دستیابی کو بہتر بنانا ہے۔