پی ٹی آئی رہنماؤں کے وارنٹ گرفتاری پر عملدرآمد تیز کرنے کا فیصلہ

اسلام آباد: پاکستان تحریک انصاف (پی ٹی آئی) کے مختلف رہنماؤں کے خلاف جاری وارنٹ گرفتاری پر عملدرآمد تیز کرنے کا فیصلہ کیا گیا ہے۔

ذرائع کے مطابق پی ٹی آئی رہنما حماد اظہر کی گرفتاری کے بعد مختلف مقدمات میں مطلوب دیگر پارٹی رہنماؤں کے پہلے سے جاری عدالتی وارنٹس پر بھی عملدرآمد تیز کرنے کا فیصلہ کیا گیا ہے۔

ذرائع کا کہنا ہے کہ نومبر 2024 کے ڈی چوک احتجاج سمیت مختلف مقدمات میں عدالتی وارنٹس کا سامنا کرنے والے پی ٹی آئی رہنماؤں کی گرفتاریوں کا امکان ہے۔

ذرائع کے مطابق مطلوب پی ٹی آئی رہنماؤں کی فہرست میں جنید اکبر، عبدالغنی، شبلی فراز، مراد سعید، زرتاج گل، عامر مسعود مغل، ڈاکٹر امجد علی، مینا خان آفریدی، علی امین گنڈاپور اور عمر تنویر بٹ شامل ہیں۔

ذرائع کا کہنا ہے کہ متعلقہ اداروں کی جانب سے ان رہنماؤں کے خلاف پہلے سے جاری وارنٹس پر عملدرآمد کے لیے اقدامات کیے جا رہے ہیں۔

تاہم ذرائع کی جانب سے فراہم کردہ معلومات میں یہ واضح نہیں کیا گیا کہ مذکورہ رہنماؤں کے خلاف وارنٹس پر فوری طور پر کن مقامات پر اور کس مرحلے میں کارروائی کی جائے گی۔