بھارت میں 600 سالہ تاریخی مسجد کے خلاف مسماری کی کارروائی، مسلمان احتجاجاً مسجد میں جمع

اجین: بھارتی ریاست مدھیہ پردیش کے شہر اجین میں 600 سال سے زائد قدیم شاہی مسجد کے ایک حصے کو سڑک کی توسیع کے منصوبے کے تحت ہٹانے کے معاملے پر کشیدگی پیدا ہوگئی، جس کے خلاف مقامی مسلمان بڑی تعداد میں مسجد میں جمع ہوگئے۔

بھارتی میڈیا کے مطابق انتظامیہ نے 2028 میں ہونے والے سمہاستھا کمبھ میلے کی تیاریوں کے سلسلے میں سڑک کو 15 میٹر تک چوڑا کرنے کا منصوبہ بنایا ہے، جس کے روٹ میں شاہی مسجد کا کچھ حصہ بھی آتا ہے۔ مسجد انتظامیہ اور مقامی مسلمانوں کی جانب سے اس اقدام کی مخالفت کی جا رہی ہے۔

مسلمان مسجد کے اندر جمع

رپورٹ کے مطابق مقامی افراد گزشتہ کئی روز سے مسجد میں احتجاجاً موجود ہیں۔ بعض افراد نے رات بھی مسجد کے اندر گزاری اور کہا کہ وہ مسجد کے ممکنہ انہدام کے خلاف پرامن طور پر احتجاج جاری رکھیں گے۔

مسجد کے امام محمد ابراہیم کے مطابق مسجد تقریباً 636 سال پرانی ہے اور اس کی تعمیر 1390ء سے منسوب کی جاتی ہے۔ ان کا کہنا ہے کہ سڑک کی توسیع کے لیے ماضی میں بھی علاقے میں کام ہوا، تاہم مذہبی مقامات کو محفوظ رکھا گیا۔

پولیس کی بھاری نفری تعینات

رپورٹ کے مطابق مسجد کے اطراف پولیس کی متعدد کمپنیاں تعینات کی گئی ہیں تاکہ امن و امان برقرار رکھا جا سکے۔ انتظامیہ نے مسجد کمیٹی کے ارکان سے مذاکرات بھی کیے ہیں۔

تاہم تازہ صورتحال کے مطابق انتظامیہ نے فی الحال مسماری کا عمل روک رکھا ہے اور پولیس حکام کا کہنا ہے کہ معاملے کو بات چیت کے ذریعے حل کرنے کی کوشش کی جا رہی ہے۔

معاملہ عدالت میں بھی زیرِ سماعت

شاہی مسجد کے حصے کو ہٹانے کے معاملے پر قانونی جنگ بھی جاری ہے۔ مدھیہ پردیش ہائی کورٹ نے رواں ماہ مسجد کے ایک حصے کو سڑک کی توسیع کے لیے ہٹانے کے خلاف دائر درخواستیں مسترد کرتے ہوئے میونسپل کارپوریشن کے اقدام کو قانونی طریقہ کار کے مطابق قرار دیا تھا۔

عدالت کے مطابق اسی سڑک پر 10 مندروں اور ایک مسجد کے حصے پہلے ہی ہٹائے جا چکے ہیں، جبکہ اجین میں تقریباً 80 مذہبی مقامات سے متعلق تعمیراتی کارروائی کا بھی عدالت نے حوالہ دیا۔ عدالت نے سڑک کی توسیع کو 2028 کے سمہاستھا کمبھ کے دوران ٹریفک اور زائرین کی آمدورفت سے متعلق انتظامات کا حصہ قرار دیا۔

مسجد انتظامیہ نے تاہم معاملہ بڑی بینچ کے سامنے اٹھایا ہے اور مزید قانونی کارروائی کا امکان بھی ظاہر کیا ہے۔

سمہاستھا کمبھ کی تیاریوں کے باعث سڑکوں کی توسیع

اجین میں 2028 کے سمہاستھا کمبھ سے قبل بڑے پیمانے پر شہری ترقی اور سڑکوں کی توسیع کے منصوبے جاری ہیں۔ انتظامیہ کے مطابق ان اقدامات کا مقصد بڑے مذہبی اجتماع کے دوران ٹریفک کی روانی اور عوامی سہولیات کو بہتر بنانا ہے۔

شاہی مسجد کے معاملے پر مقامی مسلمانوں کا مؤقف ہے کہ سڑک کی توسیع کے دوران مسجد کو محفوظ رکھا جائے، جبکہ انتظامیہ کا مؤقف قانونی طریقہ کار اور شہری منصوبہ بندی سے متعلق ہے۔