امریکا آبنائے ہرمز میں کسی قسم کا “ٹول ٹیکس” نہیں چاہتا ۔ ایران کے پاس جوہری ہتھیار نہ ہوں،صدر ٹرمپ

(واشنگٹن) امریکی صدر ٹرمپ نے کہا ہے کہ ایران کے ساتھ مذاکرات جاری ہیں اور امریکا صرف یہ چاہتا ہے کہ ایران کے پاس جوہری ہتھیار نہ ہوں۔

صدر ٹرمپ نے اپنے بیان میں کہا کہ امریکا آبنائے ہرمز میں کسی قسم کا “ٹول ٹیکس” نہیں چاہتا اور خطے میں بحری راستوں کی آزادی کو یقینی بنانا امریکی ترجیحات میں شامل ہے۔

انہوں نے دعویٰ کیا کہ امریکی نیوی مؤثر انداز میں کام کررہی ہے اور اس وقت کوئی بھی بحری جہاز ایران نہیں جاپارہا۔ ٹرمپ کے مطابق امریکا ناکہ بندی کے ذریعے آبنائے ہرمز کا کنٹرول سنبھالے ہوئے ہے۔

امریکی صدر نے مزید کہا کہ ایران کے انتہائی افزودہ یورینیم کے ذخائر کو قبضے میں لیا جائے گا تاکہ خطے میں سلامتی کو یقینی بنایا جاسکے۔

واضح رہے کہ ا یران اور امریکاکے درمیان جوہری پروگرام اور مشرق وسطیٰ کی صورتحال کے حوالے سے کشیدگی ایک بار پھر عالمی توجہ کا مرکز بنی ہوئی ہے، جبکہ آبنائے ہرمز عالمی تیل تجارت کے لیے انتہائی اہم گزرگاہ سمجھی جاتی ہے۔