ایران سے معاملات درست سمت میں جا رہے ہیں، اچھی ملاقاتیں ہوئیں: ڈونلڈ ٹرمپ

(واشنگٹن) امریکی صدر ڈونلڈ ٹرمپ نے کہا ہے کہ ایران کے ساتھ معاملات درست سمت میں آگے بڑھ رہے ہیں اور دونوں ممالک کے درمیان ہونے والی ملاقاتیں مثبت رہی ہیں۔

صحافیوں سے گفتگو کرتے ہوئے صدر ٹرمپ نے کہا، "ایران کے ساتھ معاملات بہت اچھے چل رہے ہیں، ایرانی حکام کے ساتھ اچھی ملاقاتیں ہوئیں، اب دیکھتے ہیں آگے کیا ہوتا ہے۔"

انہوں نے کہا کہ ایران کے جوہری پروگرام سے متعلق پیش رفت اطمینان بخش ہے اور امریکا کا مؤقف بدستور واضح ہے کہ ایران کو جوہری ہتھیار حاصل کرنے کی اجازت نہیں دی جا سکتی۔

صدر ٹرمپ کا کہنا تھا کہ گزشتہ ہفتے ایران پر بڑا حملہ کیا گیا تھا، تاہم اس کے باوجود دونوں ممالک کے درمیان سفارتی رابطے مثبت انداز میں جاری ہیں اور معاملات خوش اسلوبی سے آگے بڑھ رہے ہیں۔

معاشی صورتحال پر گفتگو کرتے ہوئے امریکی صدر نے کہا کہ امریکی اسٹاک مارکیٹس میں مسلسل بہتری دیکھی جا رہی ہے، جس کے باعث سرمایہ کاروں اور کاروباری حلقوں کو فائدہ پہنچ رہا ہے۔

انہوں نے مزید کہا کہ تیل کی قیمتوں میں کمی کا رجحان برقرار ہے، جو عالمی معیشت اور صارفین دونوں کے لیے مثبت پیش رفت ہے، جبکہ مضبوط اسٹاک مارکیٹ سے مجموعی اقتصادی سرگرمیوں کو بھی تقویت مل رہی ہے۔