30ویں سی این ایس اوپن گالف چیمپئن شپ 2026 اختتام پذیر، آدم سید نے پروفیشنلز کا ٹائٹل جیت لیا
زاہد فاروق ملک16 نومبر، 2026
کراچی گالف کلب میں 30ویں سی این ایس اوپن گالف چیمپئن شپ 2026 اختتام پذیر ہوگئی۔ آدم سید نے پروفیشنلز کا ٹائٹل جیت لیا، چیف آف نیول اسٹاف ایڈمرل نوید اشرف نے فاتحین میں انعامات تقسیم کیے
کراچی: کراچی گالف کلب میں منعقدہ 30ویں چیف آف دی نیول اسٹاف (سی این ایس) اوپن گالف چیمپئن شپ 2026 اختتام پذیر ہوگئی، جس میں پروفیشنلز کیٹیگری میں آدم سید نے کامیابی حاصل کرکے ٹائٹل اپنے نام کرلیا، جبکہ حمزہ تیمور امین رنر اپ رہے۔
چیمپئن شپ کی اختتامی تقریب میں چیف آف دی نیول اسٹاف ایڈمرل نوید اشرف نے بطور مہمانِ خصوصی شرکت کی اور مختلف کیٹیگریز کے فاتحین میں انعامات تقسیم کیے۔

12 سے 15 نومبر 2026 تک جاری رہنے والے اس چار روزہ ٹورنامنٹ میں ملک بھر سے پروفیشنل اور امیچور گالفرز نے شرکت کی۔ کراچی گالف کلب میں ہونے والے مقابلوں کے دوران کھلاڑیوں نے شاندار کھیل کا مظاہرہ کیا اور مختلف کیٹیگریز میں اعزازات اپنے نام کیے۔
مختلف کیٹیگریز کے فاتحین
چیمپئن شپ میں سینئر پروفیشنلز کا ٹائٹل محمد نذیر نے جیتا، جبکہ جونیئر پروفیشنلز کیٹیگری میں محمد اشاس فاتح قرار پائے۔
لیڈیز پروفیشنلز کیٹیگری میں حمنہ امجد نے کامیابی حاصل کی۔
سینئر امیچورز کیٹیگری کے نیٹ مقابلے میں کموڈور (ریٹائرڈ) غضنفر عباس اور گروس مقابلے میں میجر (ریٹائرڈ) عرفان خان نے پہلی پوزیشن حاصل کی۔

امیچورز کیٹیگری میں موسیٰ حسینی نے نیٹ جبکہ عبداللہ انصر نے گروس مقابلے میں کامیابی حاصل کی۔
خواتین کے مقابلوں میں سیدہ آمنہ خالد نے نیٹ اور حمیرا خالد نے گروس کیٹیگری کا ٹائٹل اپنے نام کیا۔
ایڈمرل نوید اشرف کی فاتحین کو مبارکباد
چیف آف دی نیول اسٹاف ایڈمرل نوید اشرف نے کامیاب کھلاڑیوں کو مبارکباد دیتے ہوئے تمام شرکاء کے کھیل کے جذبے، محنت اور لگن کو سراہا۔
مہمانِ خصوصی نے اپنے خطاب میں چیمپئن شپ کے انعقاد اور کامیابی میں اسپانسرز اور میڈیا کے کردار کو قابلِ تحسین قرار دیا، جبکہ منتظمین کی انتھک کوششوں کا بھی اعتراف کیا۔
اختتامی تقریب میں اسپانسرز، قومی سطح کے گالفرز، میڈیا نمائندگان اور دیگر اہم شخصیات نے شرکت کی۔
سی این ایس اوپن گالف چیمپئن شپ ملک میں گالف کے فروغ اور کھلاڑیوں کو اپنی صلاحیتوں کے اظہار کے مواقع فراہم کرنے کے حوالے سے ایک اہم کھیلوں کا ایونٹ ہے۔

زاہد فاروق ملک پاکستان کے ممتاز سینئر صحافی، کالم نگار اور میڈیا ایگزیکٹو ہیں۔ وہ پاکستان کے دارالحکومت اسلام آباد میں مقیم ہیں اور اس وقت وائسز آف امریکا کے بیورو چیف کے طور پر خدمات انجام دے رہے ہیں۔
شائع ہوا: 16 نومبر، 2026 کو 05:31 AM
آخری تدوین: 16 نومبر، 2026



