اب فیصلے ایوان میں نہیں میدان میں ہوں گے، مولانا فضل الرحمان کا ملک گیر احتجاج کا اعلان

(کراچی)کراچی میں جے یو آئی کی وحدتِ امت کانفرنس سے خطاب کرتے ہوئے مولانا فضل الرحمان نے کہا کہ امت مسلمہ کئی دہائیوں سے عالمی بربریت اور ظلم کا شکار ہے، امریکا اور مغرب کی طاقت کا رخ افغانستان، عراق اور لیبیا جیسے مسلم ممالک کی جانب رہا۔

انہوں نے کہا کہ غزہ میں فلسطینی مسلمانوں پر ہونے والے مظالم پر پوری دنیا خاموش تماشائی بنی رہی، جبکہ اب صورتحال ایران تک پہنچ چکی ہے۔ ان کا کہنا تھا کہ اگر ایران کمزور ہوا تو اسرائیل پاکستان کے دروازے تک پہنچ جائے گا اور اس کی نظریں حرمین الشریفین پر بھی ہیں۔

مولانا فضل الرحمان نے عرب ممالک پر زور دیا کہ وہ متحد ہو کر امت مسلمہ کے دفاع کے لیے مشترکہ دفاعی قوت تشکیل دیں۔

انہوں نے کہا کہ پاکستان اس وقت قومی یکجہتی سے محروم ہے، جبکہ جمعیت علمائے اسلام اتحاد، برداشت اور محبت کی سیاست پر یقین رکھتی ہے۔ ان کے مطابق اختلاف رائے کو شائستگی اور سلیقے کے ساتھ بیان کیا جانا چاہیے۔

جے یو آئی سربراہ نے کہا کہ وہ آئین کے وفادار ہیں اور آئین توڑنے والے ملک کی تباہی کے ذمہ دار ہوں گے۔ انہوں نے دفاعی اداروں کے احترام کا اظہار کرتے ہوئے خبردار کیا کہ اگر جمعیت علمائے اسلام کو دیوار سے لگانے کی کوشش کی گئی تو اس کے سنگین نتائج ہوں گے۔

مولانا فضل الرحمان نے الزام عائد کیا کہ جے یو آئی کو دھاندلی کے ذریعے پارلیمنٹ سے باہر رکھا جاتا ہے، حالانکہ جماعت جمہوری نظام کے تحت سیاست کرتی ہے۔ انہوں نے کہا کہ ان کی جماعت کے علما اور کارکنان دہشت گردی کا نشانہ بنتے رہے ہیں، مگر اس کے باوجود وہ ملک میں انتشار پھیلانے والوں کے سامنے نہیں جھکیں گے۔

انہوں نے بتایا کہ جے یو آئی نے امریکا اور ایران مذاکرات کے باعث اپنے احتجاجی مظاہرے مؤخر کیے تھے، تاہم اب 22 مئی کو ملک بھر کے تمام ضلعی ہیڈکوارٹرز میں مہنگائی کے خلاف احتجاج کیا جائے گا، جبکہ 4 جون کو پشین میں بڑا جلسہ بھی منعقد ہوگا۔