خیبر پختونخوا میں ایمرجنسی کے نفاذ پر اتفاق، وفاقی کابینہ سے منظوری کل متوقع

اسلام آباد: وفاقی حکومت نے خیبر پختونخوا میں ایمرجنسی کے نفاذ کے معاملے پر اتفاق کرلیا ہے، جبکہ اس فیصلے کی منظوری کے لیے وفاقی کابینہ کا اجلاس کل طلب کیے جانے کی اطلاعات ہیں۔

ذرائع کے مطابق ایوانِ صدر میں ہونے والے اہم اجلاس میں خیبر پختونخوا کی امن و امان اور سکیورٹی کی صورتحال کا جائزہ لیا گیا۔ اجلاس میں صوبے میں ایمرجنسی کے نفاذ سے متعلق امور پر غور کیا گیا، جبکہ اس سلسلے میں وفاقی کابینہ سے منظوری لیے جانے کا امکان ہے۔

ذرائع کا کہنا ہے کہ وفاقی کابینہ کا اجلاس کل صبح ساڑھے 9 بجے طلب کیا گیا ہے، جس میں خیبر پختونخوا میں ایمرجنسی کے نفاذ کی منظوری دیے جانے کی توقع ہے۔ فیصلے کی توثیق کے لیے پارلیمنٹ کے دونوں ایوانوں کے اجلاس بھی بلائے گئے ہیں۔

اس سے قبل صدرِ مملکت آصف علی زرداری اور وزیراعظم شہباز شریف کے درمیان ایوانِ صدر میں ملاقات ہوئی، جس میں ملک کی مجموعی سیاسی صورتحال اور سکیورٹی امور پر تبادلہ خیال کیا گیا۔

ایوانِ صدر سے جاری اعلامیے کے مطابق ملاقات میں نائب وزیراعظم اسحاق ڈار، وزیراعظم کے مشیر برائے سیاسی امور رانا ثناء اللہ، وفاقی وزیر داخلہ محسن نقوی، اٹارنی جنرل منصور عثمان اعوان، وزیر قانون اعظم نذیر تارڑ اور وفاقی وزیر احد چیمہ نے وزیراعظم کی معاونت کی۔

اجلاس میں صدر مملکت کی معاونت سینیٹر شیری رحمان، سید نوید قمر، سینیٹر سلیم مانڈوی والا اور ڈاکٹر عاصم نے کی۔

اجلاس میں منگل 13 اکتوبر کو قومی اسمبلی اور سینیٹ کے الگ الگ اجلاس بلانے پر اتفاق کیا گیا۔ ذرائع کے مطابق اجلاس میں گورنر خیبر پختونخوا فیصل کریم کنڈی کی جانب سے صوبے کی امن و امان اور سکیورٹی کی صورتحال سے متعلق بھجوائی گئی رپورٹ کا بھی جائزہ لیا گیا۔