فیلڈ مارشل عاصم منیر کل تہران کا دورہ کریں گے: ایرانی وزارت خارجہ

ایرانی وزارت خارجہ کے مطابق فیلڈ مارشل عاصم منیر پیر کو ایران کے دارالحکومت تہران کا دورہ کریں گے، جہاں ان کی اہم ایرانی حکام سے ملاقاتیں متوقع ہیں۔

ایرانی وزارت خارجہ کے ترجمان اسماعیل بقائی نے بتایا کہ فیلڈ مارشل عاصم منیر کے دورے کا مقصد پاکستان اور ایران کے درمیان دوطرفہ تعاون کو مزید مضبوط بنانا ہے۔ ان کے مطابق دورے کے دوران باہمی دلچسپی کے امور، علاقائی صورتحال اور دوطرفہ تعاون کے فروغ پر تبادلہ خیال کیا جائے گا۔

ترجمان نے کہا کہ فیلڈ مارشل عاصم منیر کا دورہ خطے میں امن و سلامتی کے فروغ کے لیے پاکستان کی کوششوں کا تسلسل ہے۔ دونوں ممالک کے درمیان سکیورٹی، علاقائی امن اور باہمی تعاون سے متعلق امور بھی زیر بحث آنے کا امکان ہے۔

اس سے قبل ایرانی حکومت کی جانب سے بتایا گیا تھا کہ فیلڈ مارشل عاصم منیر اور ایرانی وزیر خارجہ عباس عراقچی کے درمیان ٹیلیفونک رابطہ ہوا، جس میں علاقائی صورتحال اور جنوبی ایشیا میں امن و استحکام کے حوالے سے گفتگو کی گئی۔

ایرانی صدر کا اہم بیان

دوسری جانب ایرانی صدر مسعود پزشکیان نے ایک تقریب سے خطاب کرتے ہوئے کہا کہ ایران اس وقت بھی جنگی صورتحال سے دوچار ہے اور ملک کو معاشی، فوجی اور سکیورٹی محاذوں پر مشکلات کا سامنا ہے۔

ایرانی صدر کے مطابق ایران امریکا کی سخت پابندیوں کے باوجود ثابت قدم ہے اور غیر مساوی جنگ کا مقابلہ کرنے کی کوشش کررہا ہے۔ انہوں نے کہا کہ امریکا نے ایران کو وینزویلا بنانے کی کوشش کی، تاہم وہ اس مقصد میں کامیاب نہیں ہوسکا۔

مسعود پزشکیان نے مزید کہا کہ مخالفین چاہتے تھے کہ ایران تباہ ہوجائے، لیکن ایسا نہیں ہوسکا۔ ان کے مطابق ایران مضبوط اتحاد کے باعث دنیا کو حیران کرنے والی طاقت بن کر ابھرا ہے۔

ایرانی صدر نے امید ظاہر کی کہ عوام کو درپیش مشکلات پر جلد قابو پالیا جائے گا۔