سعودی ایئرپورٹس پر حملوں کے باعث فلائٹ آپریشن متاثر، پاکستان سے 114 پروازیں منسوخ

سلام آباد: سعودی عرب کے ایئرپورٹس پر حوثیوں کے حملوں اور فلائٹ آپریشن محدود ہونے کے باعث پاکستان سے سعودی عرب جانے اور آنے والی پروازوں کا شیڈول بری طرح متاثر ہوا ہے، جس کے نتیجے میں متعدد پروازیں منسوخ جبکہ درجنوں تاخیر کا شکار ہوگئی ہیں۔

فلائٹ شیڈول کے مطابق گزشتہ 24 گھنٹوں کے دوران ملک بھر سے مجموعی طور پر 114 پروازیں منسوخ یا نان آپریشنل رپورٹ ہوئیں، جبکہ 77 پروازوں میں تاخیر ریکارڈ کی گئی۔

ریاض ایئرپورٹ کی بندش، 28 پروازیں منسوخ

فلائٹ شیڈول کے مطابق ریاض ایئرپورٹ کی بندش کے باعث پاکستان سے ریاض جانے والی 28 پروازیں بھی منسوخ ہوگئی ہیں۔ فراہم کردہ معلومات کے مطابق ریاض ایئرپورٹ 17 اکتوبر کی رات 12 بجے تک بند رہنے کا بتایا گیا ہے۔

دوسری جانب، پاکستان انٹرنیشنل ایئرلائنز (پی آئی اے) نے ملتان سے ریاض جانے والی پرواز پی کے 765 کو متبادل ایئرپورٹ کے لیے روانہ کر دیا۔

جدہ، دمام اور مدینہ جانے والی پروازیں بھی متاثر

پروازوں کے شیڈول کے مطابق کراچی سے جدہ جانے والی دو پروازیں منسوخ کر دی گئیں، جبکہ سیالکوٹ اور ملتان سے دمام جانے والی ایک، ایک پرواز بھی منسوخ ہوئی۔

اسی طرح لاہور سے مدینہ جانے والی سعودی ایئرلائنز کی پروازوں ایس وی 724 اور ایس وی 725 میں پانچ گھنٹے کی تاخیر ہوئی۔

پروازوں کی منسوخی اور تاخیر کے باعث سعودی عرب جانے والے مسافروں کو سفری مشکلات کا سامنا کرنا پڑ سکتا ہے۔

اندرونِ ملک پروازوں کا شیڈول بھی متاثر

سعودی عرب کے لیے پروازوں میں خلل کے علاوہ پاکستان کے اندرونِ ملک فضائی آپریشن میں بھی تاخیر رپورٹ ہوئی ہے۔

فلائٹ شیڈول کے مطابق لاہور سے اسکردو جانے والی چار پروازوں میں ڈھائی سے تین گھنٹے تک تاخیر ہوئی۔

کراچی سے لاہور جانے والی پانچ پروازیں تین سے آٹھ گھنٹے جبکہ کراچی سے اسلام آباد جانے والی سات پروازیں ایک سے پانچ گھنٹے تک تاخیر کا شکار ہوئیں۔

مسافروں کے لیے اہم ہدایت

پروازوں کی منسوخی اور اوقات میں تبدیلی کے پیش نظر مسافروں کو ہدایت کی جاتی ہے کہ ایئرپورٹ روانہ ہونے سے پہلے متعلقہ ایئرلائن سے اپنی پرواز کی تازہ ترین صورت حال معلوم کرلیں۔