گلگت بلتستان انتخابات 2026: 24 نشستوں پر ووٹنگ جاری، 403 امیدوار انتخابی میدان میں
گلگت بلتستان اسمبلی انتخابات 2026 کے لیے 24 جنرل نشستوں پر پولنگ جاری ہے۔ 403 امیدوار، جن میں 8 خواتین بھی شامل ہیں، انتخابی دوڑ میں ہیں جبکہ 9 لاکھ 63 ہزار سے زائد ووٹرز حق رائے دہی استعمال کریں گے
گلگت بلتستان اسمبلی کے انتخابات کے لیے 24 جنرل نشستوں پر پولنگ کا عمل آج صبح شروع ہوگیا، جو بغیر کسی وقفے کے شام 5 بجے تک جاری رہے گا۔ ووٹرز اپنے منتخب نمائندوں کے انتخاب کے لیے مختلف پولنگ اسٹیشنز کا رخ کر رہے ہیں۔
الیکشن کمیشن کے مطابق انتخابات میں 8 خواتین سمیت مجموعی طور پر 403 امیدوار حصہ لے رہے ہیں، جبکہ 9 لاکھ 63 ہزار سے زائد رجسٹرڈ ووٹرز حقِ رائے دہی استعمال کرنے کے اہل ہیں۔
ضلع چلاس میں پہلا ووٹ کاسٹ کیا گیا، جہاں شہری مقررہ وقت سے پہلے ہی پولنگ اسٹیشنز کے باہر پہنچ گئے تھے۔ پولنگ شروع ہوتے ہی مختلف علاقوں میں ووٹرز کی آمد کا سلسلہ جاری رہا اور شہری جمہوری عمل میں بھرپور حصہ لے رہے ہیں۔
الیکشن کمیشن نے گلگت بلتستان کے تمام اضلاع میں مجموعی طور پر 1391 پولنگ اسٹیشنز قائم کیے ہیں۔ ان میں سے 349 پولنگ اسٹیشنز کو حساس جبکہ 551 کو انتہائی حساس قرار دیا گیا ہے، جہاں سیکیورٹی کے خصوصی انتظامات کیے گئے ہیں۔
سیاسی جماعتوں کے امیدواروں میں پاکستان پیپلز پارٹی کے 23، پاکستان مسلم لیگ (ن) کے 22، استحکامِ پاکستان پارٹی کے 15، پاکستان مسلم لیگ کے 11 اور جمعیت علمائے اسلام (ف) کے 9 امیدوار شامل ہیں۔
اسی طرح مجلس وحدت المسلمین کے 7، جماعت اسلامی اور متحدہ قومی موومنٹ کے 6، 6 امیدوار انتخابی میدان میں موجود ہیں، جبکہ 266 آزاد امیدوار بھی مختلف حلقوں سے قسمت آزما رہے ہیں۔
انتخابات کے پرامن انعقاد کو یقینی بنانے کے لیے مقامی پولیس، گلگت بلتستان اسکاؤٹس اور پنجاب پولیس کی بھاری نفری تعینات کی گئی ہے۔ سیکیورٹی ادارے پولنگ اسٹیشنز اور حساس مقامات پر مکمل نگرانی کر رہے ہیں تاکہ انتخابی عمل شفاف اور پرامن انداز میں مکمل کیا جا سکے۔
شائع ہوا: 7 جون، 2026 کو 06:46 AM
آخری تدوین: 7 جون، 2026
