سونے کی قیمت میں بڑی کمی، فی تولہ 15 ہزار 100 روپے سستا ہوگیا

کراچی: عالمی اور مقامی مارکیٹ میں سونے کی قیمت میں بڑی کمی ریکارڈ کی گئی ہے، جس کے بعد پاکستان میں فی تولہ سونا 15 ہزار 100 روپے سستا ہوگیا۔

آل پاکستان صرافہ ایسوسی ایشن کے مطابق 15 ہزار 100 روپے کی کمی کے بعد فی تولہ سونے کی نئی قیمت 4 لاکھ 67 ہزار 936 روپے ہوگئی ہے۔

اسی طرح 10 گرام سونے کی قیمت میں 12 ہزار 946 روپے کی کمی ریکارڈ کی گئی، جس کے بعد 10 گرام سونا 4 لاکھ 1 ہزار 179 روپے کا ہوگیا۔

چاندی کی قیمت میں بھی کمی ہوئی ہے۔ فی تولہ چاندی 397 روپے سستی ہونے کے بعد 7 ہزار 112 روپے کی سطح پر آگئی۔

دوسری جانب عالمی مارکیٹ میں فی اونس سونے کی قیمت 151 ڈالر کم ہوکر 4 ہزار 454 ڈالر ہوگئی ہے۔

گزشتہ روز پاکستان میں سونے کی قیمت مستحکم رہی تھی اور اس میں کوئی ردوبدل نہیں کیا گیا تھا۔

صرافہ ڈیلرز کے مطابق عالمی مارکیٹ میں سونے کی قیمت، امریکی ڈالر کی قدر، شرح سود سے متعلق توقعات اور سرمایہ کاروں کے رجحانات جیسے عوامل مقامی مارکیٹ پر براہ راست اثر انداز ہوتے ہیں۔

ڈیلرز کا کہنا ہے کہ اگر عالمی مارکیٹ میں سونے کی قیمت میں مزید کمی ہوتی ہے تو پاکستان میں بھی سونا مزید سستا ہونے کا امکان ہے، تاہم عالمی معاشی یا سیاسی غیر یقینی صورتحال میں اضافہ سونے کی قیمت دوبارہ بڑھا سکتا ہے۔