سونے کی فی تولہ قیمت میں 11 ہزار 300 روپے کی بڑی کمی

کراچی: کاروباری ہفتے کے تیسرے روز ملک میں سونے کی قیمت میں نمایاں کمی ریکارڈ کی گئی ہے، جس کے بعد فی تولہ سونا 11 ہزار روپے سے زائد سستا ہو گیا۔

آل پاکستان صرافہ جیمز اینڈ جیولرز ایسوسی ایشن کی جانب سے جاری کردہ نئی قیمتوں کے مطابق ملک میں فی تولہ سونے کی قیمت 11 ہزار 300 روپے کمی کے بعد 4 لاکھ 54 ہزار 36 روپے ہو گئی ہے۔

اسی طرح 10 گرام سونے کی قیمت میں بھی نمایاں کمی ریکارڈ کی گئی۔ 10 گرام سونا 9 ہزار 688 روپے سستا ہونے کے بعد 3 لاکھ 89 ہزار 262 روپے کا ہو گیا ہے۔

واضح رہے کہ گزشتہ روز بھی مقامی مارکیٹ میں سونے کی فی تولہ قیمت میں 800 روپے کی کمی ریکارڈ کی گئی تھی۔

صرافہ مارکیٹ کے مطابق عالمی مارکیٹ میں سونے کی قیمتوں میں اتار چڑھاؤ، امریکی ڈالر کی قدر میں تبدیلی، شرح سود سے متعلق توقعات اور سرمایہ کاروں کے رجحانات جیسے عوامل مقامی مارکیٹ میں سونے کی قیمتوں پر اثر انداز ہوتے ہیں۔

عالمی سطح پر سونے کی قیمت میں معمولی کمی یا اضافہ پاکستان سمیت مختلف ممالک کی مقامی منڈیوں میں بھی اثر ڈالتا ہے۔

صرافہ ڈیلرز کا کہنا ہے کہ اگر عالمی مارکیٹ میں سونے کی قیمت مزید نیچے آتی ہے تو مقامی مارکیٹ میں بھی سونے کی قیمتوں میں مزید کمی کا امکان موجود ہے۔