پنجاب میں مفت ٹرانسپورٹ اسکیم کامیاب، مسافروں کی تعداد میں ریکارڈ 60 فیصد اضافہ

(لاہور)وزیراعلیٰ پنجاب مریم نواز کا کہنا ہے کہ مفت ٹرانسپورٹ سروس کے باعث نہ صرف پبلک ٹرانسپورٹ کے استعمال میں نمایاں اضافہ ہوا ہے بلکہ شہریوں کو روزمرہ سفر میں بھی بڑی سہولت میسر آئی ہے۔

انہوں نے کہا کہ ادائیگی والے دنوں کے مقابلے میں مفت دنوں میں مسافروں کی تعداد میں نمایاں اضافہ ہوا، جس سے عوام کی اس سہولت میں دلچسپی واضح ہو گئی ہے۔

مریم نواز نے بتایا کہ موجودہ ٹرانسپورٹ سسٹم اپنی مکمل گنجائش تک پہنچ چکا ہے، جس کے پیش نظر مزید ایک ہزار بسیں شامل کرنے کا فیصلہ کیا گیا ہے تاکہ بڑھتی ہوئی طلب کو پورا کیا جا سکے۔

حکام کے مطابق اس اقدام سے شہریوں کو سستا، محفوظ اور آسان سفر میسر آیا ہے جبکہ سڑکوں پر ٹریفک کے دباؤ میں بھی کمی کی توقع ظاہر کی جا رہی ہے۔

پنجاب حکومت کا کہنا ہے کہ عوامی سہولت کو مزید بہتر بنانے کے لیے ٹرانسپورٹ نظام کو جدید خطوط پر استوار کیا جا رہا ہے اور مستقبل میں مزید منصوبے بھی متعارف کروائے جائیں گے۔