گرپتونت سنگھ پنوں قتل سازش کیس: امریکی عدالت کا بھارتی حکومت اور اعلیٰ حکام کو باضابطہ نوٹس

واشنگٹن: سکھ رہنما گرپتونت سنگھ پنوں کے قتل کی مبینہ سازش کے مقدمے میں امریکی عدالت نے بھارتی حکومت اور اعلیٰ عہدیداروں کو باضابطہ نوٹس جاری کرتے ہوئے 8 دسمبر تک جواب جمع کرانے کی ہدایت کردی۔

عدالتی نوٹس بھارتی قومی سلامتی کے مشیر اجیت دوول، سابق را چیف سمنت گوئل، وکرم یادو اور نکھل گپتا کو بھی جاری کیے گئے ہیں۔

مقدمے سے متعلق عدالتی سمن 9 اکتوبر کو واشنگٹن میں بھارتی سفارت خانے کو موصول کرائے گئے تھے۔ امریکی عدالت نے واضح کیا ہے کہ مقررہ مدت کے اندر جواب جمع نہ کرانے کی صورت میں بھارتی حکومت کے خلاف یکطرفہ فیصلہ سنایا جاسکتا ہے۔

قتل کی سازش میں بھارتی عہدیداروں پر الزامات

مقدمے کے وکیل استغاثہ کے مطابق بھارتی عہدیدار وکاس یادو نے نکھل گپتا کو سکھ رہنما گرپتونت سنگھ پنوں کے قتل کا ٹاسک دیا تھا۔

استغاثہ کا یہ بھی الزام ہے کہ قتل کی مبینہ سازش کے لیے ایک لاکھ ڈالر کی ادائیگی کی منظوری بھی وکاس یادو نے دی تھی۔

نکھل گپتا کو 20 نومبر کو سزا سنائی جائے گی

کیس میں گرفتار بھارتی شہری نکھل گپتا کو 20 نومبر کو سزا سنائی جائے گی۔

امریکی عدالت کی جانب سے بھارتی حکومت اور اعلیٰ حکام کو نوٹس جاری کیے جانے کے بعد یہ مقدمہ ایک بار پھر عالمی توجہ کا مرکز بن گیا ہے۔ عدالت کی مقرر کردہ ڈیڈ لائن تک بھارتی حکومت کے جواب اور آئندہ عدالتی کارروائی کو اہم قرار دیا جا رہا ہے۔