کوہاٹ میں پولیس ٹیم پر دہشت گرد حملہ، ڈی ایس پی سمیت 10 اہلکار شہید، 18 حملہ آور ہلاک

کوہاٹ: خیبر پختونخوا کے ضلع کوہاٹ کے قریب درابوکچ میں پولیس ٹیم پر حملے کے نتیجے میں ڈپٹی سپرنٹنڈنٹ پولیس (ڈی ایس پی) سمیت 10 پولیس اہلکار شہید ہوگئے، جبکہ پولیس کی جوابی کارروائی میں 18 حملہ آور ہلاک ہوگئے۔

تفصیلات کے مطابق خیبر پختونخوا پولیس اور مقامی سول انتظامیہ نے درابوکچ کے علاقے میں غیرقانونی سونے کی مائننگ میں ملوث عناصر کے خلاف آپریشن کیا۔ آپریشن مکمل کرنے کے بعد پولیس پارٹی واپس روانہ ہوئی تو جرائم پیشہ عناصر کے ایماء پر فتنہ الخوارج سے منسوب حملہ آوروں نے پولیس ٹیم پر حملہ کردیا۔

حملے کے دوران پولیس اہلکاروں نے شدید مزاحمت کی اور بہادری کے ساتھ حملہ آوروں کا مقابلہ کیا۔ اس دوران ہونے والی جھڑپ میں 18 حملہ آور ہلاک ہوگئے، تاہم مقابلے میں ڈی ایس پی سمیت خیبر پختونخوا پولیس کے 10 اہلکار شہید ہوگئے۔

حکام کے مطابق اس واقعے میں جرائم پیشہ عناصر اور فتنہ الخوارج کے درمیان مبینہ گٹھ جوڑ بھی سامنے آیا ہے۔ حملے کو غیرقانونی سرگرمیوں میں ملوث مافیا اور دہشت گرد عناصر کے باہمی روابط سے جوڑا جارہا ہے۔

حکام کا کہنا ہے کہ یہ واقعہ اس بات کی نشاندہی کرتا ہے کہ جرائم پیشہ گروہ اور دہشت گرد عناصر اپنے مفادات کے لیے ایک دوسرے کے ساتھ تعاون کررہے ہیں۔ ان کے مطابق فتنہ الخوارج کا اسلام اور پاکستان سے کوئی تعلق نہیں اور یہ عناصر اپنے مذموم مقاصد کے لیے جرائم پیشہ نیٹ ورکس کے ساتھ مل کر کارروائیاں کررہے ہیں۔

حکام نے واضح کیا ہے کہ بیرونی پشت پناہی سے سرگرم جرائم پیشہ عناصر، دہشت گردوں اور ان کے سہولت کاروں کے خلاف کارروائیاں جاری رکھی جائیں گی اور کسی کو بھی غیرقانونی سرگرمیوں کی اجازت نہیں دی جائے گی۔

شہید ہونے والے پولیس اہلکاروں کا تعلق خیبر پختونخوا، بالخصوص ضلع کوہاٹ سے تھا۔ حکام نے شہداء کی قربانیوں کو خراج عقیدت پیش کرتے ہوئے کہا ہے کہ ملک کے امن و امان کے لیے ان کی خدمات اور قربانیوں کو ہمیشہ یاد رکھا جائے گا۔