ہیری بروک کی تاریخی ڈبل سنچری بھی انگلینڈ کو شکست سے نہ بچا سکی

راولپنڈی: انگلینڈ کرکٹ ٹیم کے کپتان ہیری بروک نے کہا ہے کہ ڈبل سنچری بنانے کے باوجود میچ نہ جیتنے پر انہیں خوشی نہیں، کیونکہ ان کے نزدیک اننگز کی اصل اہمیت ٹیم کی فتح ہے۔

راولپنڈی کرکٹ اسٹیڈیم میں سہ ملکی ون ڈے سیریز کے تیسرے میچ میں سری لنکا نے انگلینڈ کو سنسنی خیز مقابلے کے بعد 2 وکٹوں سے شکست دے دی۔ سری لنکا نے 430 رنز کا ہدف 8 وکٹوں کے نقصان پر اننگز کی آخری گیند سے ایک گیند قبل حاصل کرلیا۔

انگلینڈ نے پہلے بیٹنگ کرتے ہوئے مقررہ 50 اوورز میں 4 وکٹوں کے نقصان پر 429 رنز بنائے۔ انگلش کپتان ہیری بروک نے جارحانہ بیٹنگ کرتے ہوئے 114 گیندوں پر 202 رنز کی اننگز کھیلی، جس میں 10 چھکے اور 21 چوکے شامل تھے۔

تاہم ہیری بروک کی ریکارڈ ساز اننگز بھی انگلینڈ کو شکست سے نہ بچا سکی۔ سری لنکا نے ہدف کا تعاقب کرتے ہوئے ون ڈے کرکٹ کی تاریخ کے بڑے رن چیزز میں سے ایک مکمل کیا۔

میچ کے بعد پریس کانفرنس کرتے ہوئے ہیری بروک نے کہا کہ وہ ہمیشہ میچ جتوانے والی اننگز کھیلنے کی اہمیت پر زور دیتے ہیں۔ ان کا کہنا تھا کہ ڈبل سنچری بنانے کے باوجود میچ نہ جیتنے پر خوشی نہیں ہے اور ان کے لیے اس ڈبل سنچری کی کوئی اہمیت نہیں، کیونکہ ٹیم کامیاب نہیں ہوسکی۔

انگلش کپتان نے سری لنکن ٹیم کی کارکردگی کو سراہتے ہوئے کہا کہ سری لنکا نے شاندار کرکٹ کھیلی، باؤنڈریز لگانے کے ساتھ سنگلز بھی حاصل کیے اور ہدف کا تعاقب کامیابی سے مکمل کیا۔

ہیری بروک نے راولپنڈی کرکٹ اسٹیڈیم کی پچ کو بھی بہترین قرار دیا۔ ان کے مطابق میچ میں مجموعی طور پر تقریباً 900 رنز بنے، جبکہ اسٹیڈیم میں انگلینڈ کے جھنڈے دیکھ کر بھی انہیں خوشی ہوئی۔