ہاکی ورلڈ کپ کی تیاری: قومی اسکواڈ کے انتخاب کا اختیار غیرملکی کوچز کے سپرد، فٹنس کو اولین ترجیح

اسلام آباد: پاکستان ہاکی فیڈریشن (پی ایچ ایف) نے ہاکی ورلڈ کپ کی تیاریوں کے سلسلے میں اہم فیصلہ کرتے ہوئے قومی ٹیم کے ورلڈ کپ اسکواڈ کے انتخاب کا اختیار غیرملکی کوچز کے سپرد کر دیا ہے۔

پاکستان ہاکی فیڈریشن کے مطابق ورلڈ کپ کے لیے صرف وہی کھلاڑی منتخب کیے جائیں گے جو مکمل طور پر فٹ ہوں اور مطلوبہ معیار پر پورا اتریں۔ فیڈریشن نے واضح کیا ہے کہ کھلاڑیوں کی جسمانی فٹنس پر کسی بھی قسم کا سمجھوتہ نہیں کیا جائے گا۔

ذرائع کے مطابق غیرملکی کوچز تمام ممکنہ کھلاڑیوں کے فٹنس ٹیسٹ مکمل کرنے کے بعد ایک جامع رپورٹ تیار کریں گے، جس کی بنیاد پر قومی ورلڈ کپ اسکواڈ کو حتمی شکل دی جائے گی۔

اس وقت اسلام آباد میں قومی ہاکی ٹیم کا تربیتی کیمپ جاری ہے، جہاں غیرملکی کوچز روزانہ دو سیشنز میں کھلاڑیوں کی جسمانی فٹنس، برداشت، رفتار اور مجموعی کارکردگی کا تفصیلی جائزہ لے رہے ہیں۔

پاکستان ہاکی فیڈریشن کا کہنا ہے کہ ورلڈ کپ میں مضبوط اور مسابقتی ٹیم میدان میں اتارنے کے لیے میرٹ، فٹنس اور کارکردگی کو انتخاب کا بنیادی معیار بنایا گیا ہے۔