بہار میں مسلمان خاتون کے ساتھ مبینہ مذہبی تذلیل، زبردستی سندور لگانے کی ویڈیو پر شدید ردِعمل

(نئی دہلی) بھارتی ریاست بہار میں ایک مسلمان خاتون کے ساتھ مبینہ مذہبی تذلیل اور بدسلوکی کا واقعہ سامنے آیا ہے، جس کی ویڈیو سوشل میڈیا پر گردش کر رہی ہے اور اس پر مختلف حلقوں کی جانب سے شدید ردِعمل سامنے آ رہا ہے۔

رپورٹس کے مطابق یہ واقعہ بہار کے ضلع نواڈا کے علاقے کمل پور میں پیش آیا، جہاں ایک ہجوم نے مبینہ طور پر مسلمان خاتون کا برقع کھینچا، نقاب اتروایا اور اس کی رضامندی کے بغیر پیشانی پر سندور لگا دیا۔ واقعے کے دوران مذہبی نعرے بھی لگائے گئے۔

بھارتی جریدے دی ہندوستان گزٹ کے مطابق خاتون نے اس عمل کی مزاحمت کی، تاہم ہجوم اس کی ویڈیو بناتا رہا۔ رپورٹ میں یہ بھی کہا گیا ہے کہ خاتون جب اپنے اسکوٹر پر وہاں سے روانہ ہونے کی کوشش کر رہی تھی تو کچھ افراد نے اس کا تعاقب بھی کیا۔

واقعے کی ویڈیو منظرِ عام پر آنے کے بعد سوشل میڈیا پر صارفین نے اس کی مذمت کرتے ہوئے ذمہ دار افراد کے خلاف کارروائی کا مطالبہ کیا ہے۔

یہ واقعہ ایسے وقت میں سامنے آیا ہے جب گزشتہ برس دسمبر میں بھی بہار کے وزیراعلیٰ نتیش کمار ایک تقریب کے دوران ایک مسلمان خاتون ڈاکٹر کا نقاب کھینچنے کے واقعے کی وجہ سے تنقید کی زد میں آئے تھے۔

تاحال اس واقعے پر مقامی انتظامیہ یا پولیس کی جانب سے باضابطہ مؤقف یا کسی قانونی کارروائی کی تفصیلات سامنے نہیں آئی ہیں۔