آئی سی سی نے ویمنز ٹی ٹونٹی ورلڈ کپ 2026 کے لیے انعامی رقم کا اعلان کر دیا
آئی سی سی نے انگلینڈ میں شیڈول ویمنز ٹی ٹونٹی ورلڈ کپ 2026 کے لیے 87 لاکھ ڈالر سے زائد انعامی رقم کا اعلان کر دیا، فاتح ٹیم کو 23 لاکھ 40 ہزار ڈالر ملیں گے۔
انٹرنیشنل کرکٹ کونسل (آئی سی سی) نے انگلینڈ میں شیڈول ویمنز ٹی ٹونٹی ورلڈ کپ 2026 کے لیے انعامی رقم کا باضابطہ اعلان کر دیا ہے، جس میں گزشتہ ایڈیشن کے مقابلے میں 10 فیصد اضافہ کیا گیا ہے۔
آئی سی سی کے مطابق اس بار مجموعی انعامی رقم 79 لاکھ ڈالرز سے بڑھا کر 87 لاکھ 64 ہزار 615 ڈالرز مقرر کی گئی ہے، جس سے خواتین کرکٹ کے فروغ میں مزید بہتری کی توقع کی جا رہی ہے۔
نئے اعلان کے مطابق ورلڈ کپ جیتنے والی ٹیم کو 23 لاکھ 40 ہزار ڈالرز کا انعام دیا جائے گا، جبکہ فائنل میں شکست کھانے والی رنر اپ ٹیم 11 لاکھ 70 ہزار ڈالرز حاصل کرے گی۔
اس کے علاوہ سیمی فائنل تک رسائی حاصل کرنے والی دونوں ناکام ٹیموں کو فی ٹیم 6 لاکھ 75 ہزار ڈالرز دیے جائیں گے۔ گروپ مرحلے میں ہر فتح پر ٹیم کو 31 ہزار 154 ڈالرز ملیں گے۔
آئی سی سی کے مطابق ٹورنامنٹ میں شریک ہر ٹیم کے لیے 2 لاکھ 47 ہزار ڈالرز کی رقم بھی یقینی بنائی گئی ہے، تاکہ تمام ٹیموں کو مالی طور پر بہتر معاونت فراہم کی جا سکے۔
یاد رہے کہ ویمنز ٹی ٹونٹی ورلڈ کپ 2026 کا آغاز 12 جون سے انگلینڈ میں ہوگا، جہاں دنیا کی بہترین ٹیمیں ٹرافی کے حصول کے لیے ایکشن میں نظر آئیں گی۔
شائع ہوا: 13 اپریل، 2026 کو 02:47 PM
آخری تدوین: 13 اپریل، 2026
