امریکی ایوان نمائندگان میں وزیر جنگ پیٹ ہیگسیتھ کے مواخذے کی قرارداد مسترد

واشنگٹن: امریکی ایوان نمائندگان نے وزیر جنگ پیٹ ہیگسیتھ کے خلاف مواخذے کی قرارداد مسترد کردی۔ قرارداد کے حق میں 204 جبکہ مخالفت میں 211 ووٹ ڈالے گئے، جس کے بعد ہیگسیتھ کے مواخذے کی کوشش ناکام ہوگئی۔

امریکی وزیر جنگ کے خلاف مواخذے کی قرارداد صدر ڈونلڈ ٹرمپ کی ری پبلکن پارٹی کے رکن کانگریس تھامس میسی نے پیش کی تھی۔ انہوں نے ایران کے خلاف امریکی فوجی کارروائی کو غیر قانونی قرار دیتے ہوئے مؤقف اختیار کیا کہ پیٹ ہیگسیتھ نے کانگریس کو نظرانداز کیا اور جنگی اختیارات کا غیر قانونی استعمال کیا۔

قرارداد میں پیٹ ہیگسیتھ پر ایران کے شہر میناب میں اسکول پر امریکی حملے کے دوران بچوں سمیت معصوم شہریوں کی ہلاکتوں کے حوالے سے بھی الزامات عائد کیے گئے تھے۔ قرارداد کے حامیوں کا کہنا تھا کہ وزیر جنگ نے امریکی آئین کی خلاف ورزی اور اپنے عہدے کا غلط استعمال کیا۔

ٹرمپ کا مواخذے کی قرارداد مسترد ہونے پر ردعمل

امریکی صدر ڈونلڈ ٹرمپ نے مواخذے کی قرارداد ناکام ہونے پر خوشی کا اظہار کرتے ہوئے کہا کہ پیٹ ہیگسیتھ کے مواخذے کی کوشش بری طرح ناکام ہوگئی۔

ٹرمپ نے کہا کہ تھامس میسی کے علاوہ تمام ری پبلکن ارکان نے پیٹ ہیگسیتھ کی حمایت میں ووٹ دیا۔ ان کے مطابق وینزویلا اور ایران میں کامیابیاں حاصل ہوئیں جبکہ فوج میں ریکارڈ تعداد میں بھرتیاں بھی کی گئیں۔

امریکی صدر نے مزید کہا کہ ایوان نمائندگان نے پیٹ ہیگسیتھ کو بری کردیا ہے اور ڈیموکریٹس امریکا کے ساتھ زیادتی کر رہے ہیں، جنہیں روکنا ضروری ہے۔

پیٹ ہیگسیتھ کا مواخذے کی کوشش پر مؤقف

مواخذے کی قرارداد پر ووٹنگ سے قبل وزیر جنگ پیٹ ہیگسیتھ نے اس اقدام کو محض ایک تماشا قرار دیا تھا۔

ان کا کہنا تھا کہ مواخذے کی قرارداد ان کا کچھ نہیں بگاڑ سکتی اور یہ کوشش دراصل امریکا کے تمام فوجیوں کے خلاف سازش ہے۔

ہیگسیتھ نے اپنے دفاع میں کہا تھا کہ امریکی تاریخ میں فوجی آپریشن کے دوران کسی وزیر جنگ کو معزول نہیں کیا گیا اور ایران کے خلاف فوجی کارروائی قانونی حیثیت رکھتی ہے۔

ایوان نمائندگان میں مواخذے کی قرارداد مسترد ہونے کے بعد پیٹ ہیگسیتھ کو فی الحال اپنے عہدے پر برقرار رہنے کا سیاسی ریلیف مل گیا ہے۔