عمران خان شفا انٹرنیشنل ہسپتال میں معائنے کے بعد اڈیالہ جیل واپس منتقل

اسلام آباد: بانی پاکستان تحریک انصاف (پی ٹی آئی) عمران خان کو شفا انٹرنیشنل ہسپتال میں طبی معائنے اور مختصر قیام کے بعد واپس اڈیالہ جیل منتقل کر دیا گیا ہے۔

جیل ذرائع کے مطابق عمران خان کو ہسپتال میں معائنے کے بعد دوبارہ اڈیالہ جیل لایا گیا، جہاں انہیں ان کے سیل میں منتقل کر دیا گیا۔ اس موقع پر شفا انٹرنیشنل ہسپتال کے اطراف سکیورٹی کے سخت انتظامات کیے گئے تھے جبکہ پولیس کی بھاری نفری بھی تعینات رہی۔

قبل ازیں عمران خان کو انتہائی سخت سکیورٹی میں اڈیالہ جیل سے شفا انٹرنیشنل ہسپتال منتقل کیا گیا تھا۔ ہسپتال انتظامیہ کی جانب سے ان کے طبی معائنے اور علاج کے لیے ضروری انتظامات مکمل کیے گئے تھے۔

عمران خان کی بہنیں اور ان کے معالج بھی اڈیالہ جیل پہنچے تھے۔ ڈاکٹر عظمیٰ خان اور ڈاکٹر فیصل گیٹ نمبر 5 سے جیل کے اندر داخل ہوئے، جبکہ نورین نیازی جیل کے باہر موجود رہیں۔

عمران خان کی ہسپتال منتقلی کے معاملے پر وزیر قانون اعظم نذیر تارڑ نے کہا تھا کہ بانی پی ٹی آئی کو ہسپتال منتقل کرنے کی ذمہ داری اسلام آباد انتظامیہ کی ہے اور انتظامیہ ہی اس معاملے کو دیکھ رہی ہے۔

دوسری جانب وزیراعظم کے سیاسی مشیر رانا ثنا اللہ نے عمران خان کو ہسپتال منتقل کرنے کے فیصلے پر تنقید کرتے ہوئے کہا تھا کہ بانی پی ٹی آئی کو دیا گیا ریلیف قانون کے مطابق نہیں۔ ان کا کہنا تھا کہ سابق وزیراعظم نواز شریف کو بھی سروسز ہسپتال منتقل کیا گیا تھا، تاہم وہ ڈاکٹرز کی رپورٹ کے بعد علاج کے لیے بیرون ملک گئے تھے۔

خیال رہے کہ سپریم کورٹ آف پاکستان نے عمران خان کے علاج کے لیے انہیں اڈیالہ جیل سے ہسپتال منتقل کرنے اور طبی معائنہ کے لیے میڈیکل بورڈ تشکیل دینے کا حکم دیا تھا۔ بعد ازاں عمران خان کی ہسپتال منتقلی کے خلاف دائر نظرثانی درخواست رجسٹرار آفس نے بعض اعتراضات عائد کرکے واپس کر دی تھی۔