ایران کا جوابی وار، امریکی فضائی اڈے پر حملے کا دعویٰ

(تہران) ایران اور امریکا کے درمیان کشیدگی میں خطرناک اضافہ دیکھنے میں آ رہا ہے، جہاں ایرانی شہر بندر عباس پورٹ کے قریب امریکی فضائی حملوں کے بعد ایران نے جوابی کارروائی شروع کرنے کا دعویٰ کیا ہے۔

پاسدارانِ انقلاب کی جانب سے جاری بیان میں کہا گیا ہے کہ خطے میں موجود ایک امریکی فضائی اڈے کو نشانہ بنایا گیا، جہاں سے ایران پر حملے کیے گئے تھے۔ ایرانی حکام نے خبردار کیا کہ اگر امریکا نے دوبارہ جارحیت کی تو ایران کا ردعمل پہلے سے زیادہ سخت اور فیصلہ کن ہوگا۔

ایرانی پاسدارانِ انقلاب کے مطابق دشمن کو یہ پیغام دے دیا گیا ہے کہ ہر حملے کا جواب دیا جائے گا اور اس کے نتائج کی مکمل ذمہ داری جارح فریق پر عائد ہوگی۔

ایرانی حکام نے مزید دعویٰ کیا کہ آبنائے ہرمز میں 3 جہازوں کو داخل ہونے سے روک دیا گیا ہے۔ دوسری جانب برطانوی نشریاتی ادارے نے ایرانی قونصل خانے کے حوالے سے رپورٹ کیا کہ ایرانی فوج نے آبنائے ہرمز سے گزرنے والے ایک امریکی آئل ٹینکر پر فائرنگ کی، جس کے بعد اسے واپس جانے پر مجبور ہونا پڑا۔ رپورٹ کے مطابق آئل ٹینکر مبینہ طور پر اپنا ریڈار بند کر کے گزرنے کی کوشش کر رہا تھا۔

ادھر عرب میڈیا کے مطابق امریکا نے دعویٰ کیا ہے کہ اس نے 3 ایرانی ڈرونز کو مار گرایا ہے، جو خطے میں نگرانی یا ممکنہ حملوں کے لیے استعمال کیے جا رہے تھے۔

واضح رہے کہ امریکا نے ایک ہفتے کے دوران دوسری بار ایران کے خلاف فضائی حملے کیے ہیں۔ امریکی حکام کے مطابق حملوں میں آبنائے ہرمز کے قریب ایرانی فوجی اہداف کو نشانہ بنایا گیا۔ واشنگٹن کا مؤقف ہے کہ کارروائی کا مقصد امریکی افواج اور عالمی تجارتی جہازوں کو لاحق خطرات کا خاتمہ تھا۔

دفاعی اور سفارتی ماہرین کے مطابق ایران اور امریکا کے درمیان بڑھتی ہوئی عسکری کشیدگی خطے میں بڑے تصادم کا خطرہ پیدا کر سکتی ہے، جبکہ آبنائے ہرمز کی صورتحال عالمی تیل منڈی اور بین الاقوامی تجارت کے لیے بھی انتہائی حساس سمجھی جا رہی ہے۔