صدر زرداری اور ایرانی صدر پزشکیان کی ملاقات، پاکستان ایران تعلقات مزید مضبوط بنانے کے عزم کا اعادہ

(اسلام آباد) صدر آصف علی زرداری اور ایران کے صدر ڈاکٹر مسعود پزشکیان کے درمیان ایوانِ صدر میں اہم ملاقات ہوئی، جس میں دوطرفہ تعلقات، علاقائی امن و استحکام اور باہمی تعاون کے فروغ پر تفصیلی تبادلۂ خیال کیا گیا۔

ملاقات کے دوران صدر آصف علی زرداری نے پاکستان کی جانب سے ایران کی خودمختاری اور علاقائی سالمیت کی مکمل حمایت کا اعادہ کرتے ہوئے خطے میں پائیدار امن کے قیام کے لیے مذاکرات اور سفارتکاری کی اہمیت پر زور دیا۔

ایرانی صدر ڈاکٹر مسعود پزشکیان نے امن، مکالمے اور علاقائی استحکام کے لیے پاکستان کے مثبت اور تعمیری کردار کو سراہا۔ انہوں نے کہا کہ ایران پاکستان کے ساتھ سیاسی، اقتصادی اور سکیورٹی تعاون کو مزید وسعت دینے کا خواہاں ہے۔

دونوں رہنماؤں نے اقتصادی تعاون، رابطہ کاری، سرحدی روابط اور علاقائی سلامتی سے متعلق امور پر بھی تفصیلی گفتگو کی۔ صدر زرداری نے اسلام آباد میں طے پانے والی مفاہمتی یادداشت کا خیرمقدم کرتے ہوئے خطے میں مستقل امن کے قیام کی امید ظاہر کی۔

صدر آصف علی زرداری نے ایران کے سپریم لیڈر آیت اللہ سید علی خامنہ ای کے لیے نیک تمناؤں کا اظہار بھی کیا، جبکہ ایرانی صدر نے حالیہ مشکل حالات میں پاکستان کی جانب سے تعاون اور حمایت پر شکریہ ادا کیا۔

ملاقات کے اختتام پر دونوں رہنماؤں نے پاکستان اور ایران کے درمیان برادرانہ تعلقات کو مزید مضبوط بنانے، باہمی تعاون بڑھانے اور مشترکہ مفادات کے حصول کے لیے قریبی رابطے برقرار رکھنے کے عزم کا اعادہ کیا۔ صدر زرداری نے مسلم اُمہ کے اتحاد اور خلیجی ممالک کے ساتھ مضبوط تعلقات برقرار رکھنے کے عزم کا بھی اظہار کیا۔