مہر گڑھ عجائب گھر کی بحالی کا منصوبہ مکمل، دوبارہ افتتاح رواں ماہ ہوگا

بلوچستان کے تاریخی مہر گڑھ عجائب گھر کی بحالی اور ثقافتی ورثے کے تحفظ کا منصوبہ کامیابی سے مکمل کر لیا گیا ہے۔ امریکی ناظم الامور نیٹلی بیکر نے کہا ہے کہ امریکی مہارت اور پاک امریکا اشتراک سے 8 ہزار سال قدیم مہر گڑھ تہذیب کے عظیم ورثے کو محفوظ بنانے میں حقیقی پیش رفت ہوئی ہے۔

اس سلسلے میں منعقدہ تقریب میں نیٹلی بیکر، بلوچستان کے پارلیمانی سیکرٹری نواب زادہ میر محمد زرین خان مگسی اور سندھ ایکسپلوریشن اینڈ ایڈونچر سوسائٹی کی قیادت نے شرکت کی۔

امریکن ایمبیسیڈرز فنڈ فار کلچرل پریزرویشن کے تحت بلوچستان میں یہ پہلا منصوبہ ہے، جس میں قدیم آثار کی حفاظت، عجائب گھر کی جدید خطوط پر تزئین و آرائش، نمائش کے معیار میں بہتری اور مقامی ماہرین کی تربیت شامل ہے۔

نیٹلی بیکر کا کہنا تھا کہ یہ منصوبہ نہ صرف تاریخی ورثے کو محفوظ بنائے گا بلکہ مقامی آبادی کے لیے روزگار کے مواقع بھی پیدا کرے گا۔ منصوبے کی تکمیل کے بعد امریکی ثقافتی تحفظ پروگرام کا دائرہ پاکستان کے چاروں صوبوں تک پھیل گیا ہے۔

تقریب کے دوران مہر گڑھ عجائب گھر کی باضابطہ دوبارہ کشادگی سے قبل یادگاری تختی کی نقاب کشائی بھی کی گئی۔ عجائب گھر کا دوبارہ افتتاح رواں ماہ کوئٹہ میں متوقع ہے۔