ایل پی جی کی قیمتوں میں من مانا اضافہ، مختلف شہروں میں فی کلو قیمت 650 روپے تک پہنچ گئی
پاکستان میں ایل پی جی کی من مانی قیمتوں پر فروخت جاری، کوئٹہ میں فی کلو قیمت 650 روپے تک پہنچ گئی۔ لاہور، راولپنڈی اور دیگر شہروں میں بھی قیمتیں بلند ہیں۔ حکومت نے مقامی ایل پی جی کی 90 فیصد پیداوار کی شفاف نیلامی کا فیصلہ کرلیا
اسلام آباد: ملک بھر میں ایل پی جی کی من مانی قیمتوں پر فروخت جاری ہے جبکہ حکومت تاحال قیمتوں کو کنٹرول کرنے میں کامیاب نہیں ہوسکی۔ کوئٹہ اور گردونواح میں ایل پی جی 650 روپے فی کلو تک فروخت ہو رہی ہے۔
تفصیلات کے مطابق لاہور، راولپنڈی، ملتان اور سرگودھا میں ایل پی جی کی قیمت 550 سے 600 روپے فی کلو، کراچی میں 530 سے 580 روپے جبکہ گھوٹکی میں 600 روپے فی کلو تک پہنچ گئی ہے۔
دوسری جانب حکومت نے قیمتوں پر قابو پانے اور منصفانہ تقسیم کے لیے مقامی ایل پی جی کی 90 فیصد پیداوار کی شفاف نیلامی کا فیصلہ کیا ہے۔ مقامی پیداوار کا 10 فیصد سرکاری مارکیٹنگ کمپنیوں کے لیے مختص ہوگا جبکہ باقی 90 فیصد میڈیا کی موجودگی میں نیلام کیا جائے گا۔
نئے نظام کے تحت ہر کمپنی کو روزانہ زیادہ سے زیادہ 20 میٹرک ٹن ایل پی جی خریدنے کی اجازت ہوگی۔
وزیر پٹرولیم علی پرویز ملک کے مطابق نیلامی کا نیا نظام ایل پی جی کی منصفانہ تقسیم، سپلائی چین کے استحکام اور توانائی کے تحفظ میں مدد دے گا۔ ان کا کہنا تھا کہ حکومت صارفین کو مناسب قیمتوں پر ایل پی جی کی فراہمی یقینی بنانا چاہتی ہے، جبکہ یومیہ پیداوار کی نگرانی کرکے اعداد و شمار وزیراعظم کو پیش کیے جائیں گے۔
شائع ہوا: 7 نومبر، 2026 کو 05:01 PM
آخری تدوین: 7 نومبر، 2026
