ایران نے امریکی خاتون کو ملک چھوڑنے کی اجازت دے دی، ٹرمپ نے خیرسگالی کے اقدام کا خیرمقدم

امریکی صدر ڈونلڈ ٹرمپ نے کہا ہے کہ ایران نے ایک امریکی خاتون کو ملک چھوڑنے کی اجازت دے دی ہے، جسے انہوں نے دونوں ممالک کے درمیان خیرسگالی کا مثبت اقدام قرار دیا۔

ٹرمپ نے سوشل میڈیا پر جاری اپنے بیان میں کہا کہ متعلقہ امریکی خاتون کو بائیڈن انتظامیہ کے دور میں 2024 کے دوران غلط طور پر حراست میں لیا گیا تھا۔ انہوں نے کہا کہ امریکا ایران کے اس اقدام کو سراہتا ہے اور اسے مثبت پیش رفت سمجھتا ہے۔

انسانی حقوق کے وکیل جیرڈ جینسر نے رہا ہونے والی امریکی شہری کی شناخت ڈینا کراری کے نام سے کی ہے۔ ان کے مطابق ڈینا کراری کو دسمبر 2024 سے ایران سے باہر جانے کی اجازت نہیں دی جا رہی تھی۔

جیرڈ جینسر نے سماجی رابطے کی ویب سائٹ ایکس پر بتایا کہ ڈینا کراری اب محفوظ ہیں اور امریکا واپس جا رہی ہیں۔ انہوں نے ان کی رہائی کے لیے صدر ڈونلڈ ٹرمپ اور اس عمل میں شامل تمام متعلقہ افراد کی کوششوں پر اظہارِ تشکر بھی کیا۔

یہ پیش رفت ایسے وقت میں سامنے آئی ہے جب ایران اور امریکا کے تعلقات مختلف معاملات پر کشیدگی کا شکار رہے ہیں، تاہم امریکی حکام نے اس اقدام کو مثبت اشارہ قرار دیا ہے۔