ایران کا سخت انتباہ: دوبارہ حملہ ہوا تو جنگ خطے سے باہر پھیل جائے گی، پاسدارانِ انقلاب

( تہران )ایرانی پاسدارانِ انقلاب نے امریکا اور اسرائیل کو سخت انتباہ جاری کرتے ہوئے خبردار کیا ہے کہ اگر ایران پر دوبارہ حملے کیے گئے تو جنگ صرف خطے تک محدود نہیں رہے گی بلکہ اس کا دائرہ مزید وسیع ہوسکتا ہے۔

پاسدارانِ انقلاب کی جانب سے جاری بیان میں کہا گیا کہ امریکا اور اسرائیل اپنی اسٹریٹجک ناکامیوں سے کوئی سبق نہیں سیکھ سکے اور ایک بار پھر دھمکیوں کی زبان استعمال کر رہے ہیں۔ ایرانی فورسز نے واضح کیا کہ اب تک اسلامی انقلاب کی تمام عسکری صلاحیتیں استعمال نہیں کی گئیں۔

بیان میں مزید کہا گیا کہ ایران کے حملے ایسے مقامات تک پہنچ سکتے ہیں جن کا دشمن تصور بھی نہیں کرسکتا۔ پاسدارانِ انقلاب نے دعویٰ کیا کہ میدانِ جنگ میں ایران کی اصل طاقت دنیا دیکھے گی۔

ایرانی بیان میں مزید کہا گیا کہ ایران صرف بیانات یا آن لائن جنگ پر یقین نہیں رکھتا بلکہ عملی طاقت کے ذریعے جواب دینے کی صلاحیت رکھتا ہے۔ اس سخت مؤقف کے بعد مشرقِ وسطیٰ میں کشیدگی مزید بڑھنے کا خدشہ ظاہر کیا جا رہا ہے۔

دوسری جانب عالمی مبصرین کا کہنا ہے کہ ایران، امریکا اور اسرائیل کے درمیان بڑھتی ہوئی کشیدگی پورے خطے کے امن کے لیے خطرناک ثابت ہوسکتی ہے، جبکہ سفارتی کوششوں کی ناکامی کسی بڑے تصادم کا سبب بن سکتی ہے۔