ایران کا سخت مؤقف، دشمنی کرنے والوں کو سخت سزا دینے کی دھمکی

(تہران)ایرانی ترجمان نے سماجی رابطے کی ویب سائٹ ایکس پر جاری ایک تفصیلی بیان میں کہا کہ اگر دنیا بربریت اور تسلط کو مسترد کرتی ہے تو اسے ایران کے حق میں آواز بلند کرنا ہوگی۔ انہوں نے عالمی برادری سے مطالبہ کیا کہ جارح قوتوں کو روکنے کیلئے فوری عملی اقدامات کیے جائیں، اس سے پہلے کہ دنیا کو لاقانونیت اور محکومیت کی طرف دھکیل دیا جائے۔

اسماعیل بقائی نے الزام عائد کیا کہ امریکا اور اسرائیل نے 28 فروری کو ایران پر جنگ مسلط کی، جو صرف زمین یا وسائل کیلئے نہیں بلکہ مستقبل میں “اچھائی اور برائی” کے مفہوم طے کرنے کی جنگ ہے۔

انہوں نے کہا کہ ایران پر حملہ کرنے والی طاقتیں بین الاقوامی جنگی قوانین کی خلاف ورزیوں پر خوشی کا اظہار کر رہی ہیں اور شہری مقامات، حتیٰ کہ خواتین کے اسپورٹس ہالز کو بھی میزائل حملوں کا نشانہ بنایا جا رہا ہے۔

ترجمان نے مزید کہا کہ دوسری جانب ایرانی عوام اور افواج ہر ممکن حد تک بے گناہ جانوں کو بچانے کی کوشش کر رہے ہیں۔ ان کے بقول یہ جنگ “جھوٹ پھیلانے والوں اور اپنے وطن کا دفاع کرنے والے باوقار لوگوں” کے درمیان ہے، اور ایسے حالات میں خاموش رہنا بھی برائی کا ساتھ دینے کے مترادف ہے۔

علاوہ ازیں اسماعیل بقائی نے بتایا کہ عباس عراقچی برکس سربراہی اجلاس میں شرکت کیلئے انڈیا جائیں گے، جہاں وہ مختلف عالمی رہنماؤں سے ملاقاتیں بھی کریں گے۔