افغان رجیم کے 4 ڈرونز بلوچستان میں داخل، پاکستان کی بروقت کارروائی، تمام ڈرونز تباہ: آئی ایس پی آر

(اسلام آباد) پاک فوج کے شعبہ تعلقات عامہ (آئی ایس پی آر) نے کہا ہے کہ افغان رجیم کی جانب سے بلوچستان کی سرحد پر 4 ابتدائی نوعیت کے ڈرون بھیجے گئے، جنہیں پاکستان کے جدید فضائی دفاعی نظام نے بروقت نشانہ بنا کر تباہ کر دیا۔

آئی ایس پی آر کے جاری کردہ بیان کے مطابق 30 جون کو افغان رجیم نے اپنی زیرِ انتظام سرزمین سے سرگرم دہشت گرد تنظیموں کی مبینہ سرپرستی کے تسلسل میں بلوچستان کی سرحد کی جانب چار ڈرون روانہ کیے۔ پاکستان کے فضائی دفاعی نظام نے فوری طور پر ان ڈرونز کی نشاندہی کی، جس کے بعد سکیورٹی فورسز نے مؤثر کارروائی کرتے ہوئے تمام ڈرونز کو کامیابی سے تباہ کر دیا۔

بیان میں کہا گیا کہ سکیورٹی فورسز نے اعلیٰ سطح کی پیشہ ورانہ صلاحیت اور آپریشنل تیاری کا مظاہرہ کیا، جس کے باعث دشمن کے تمام مبینہ عزائم ناکام بنا دیے گئے۔

آئی ایس پی آر کے مطابق افغان رجیم کی جانب سے اس نوعیت کی کارروائیوں کا مقصد اپنے زیرِ انتظام علاقوں میں درپیش داخلی مسائل سے عوام کی توجہ ہٹانا ہے۔ بیان میں زور دیا گیا کہ افغان حکام کو اشتعال انگیز اقدامات اور بیانات کے بجائے دہشت گردی کی سرپرستی ترک کرتے ہوئے پرامن بقائے باہمی کے اصولوں پر عمل کرنا چاہیے۔

ترجمان پاک فوج نے خبردار کیا کہ اگر پاکستان کے خلاف سرحد پار اشتعال انگیزی یا مہم جوئی کا سلسلہ جاری رہا تو اس کا فوری، فیصلہ کن اور مؤثر جواب دیا جائے گا، جس کی بھاری قیمت چکانا پڑے گی۔

آئی ایس پی آر نے مزید واضح کیا کہ پاکستان کی مسلح افواج ملک کی خودمختاری، سرحدوں اور عوام کے جان و مال کے تحفظ کے لیے ہر وقت مکمل طور پر چوکس ہیں، اور کسی بھی سرحد پار خطرے یا اشتعال انگیزی کا جواب آپریشن غضب للحق کے تحت بھرپور انداز میں دیا جاتا رہے گا۔