اسرائیل لبنان مذاکرات کا آغاز، نیتن یاہو کی کابینہ کو فوری بات چیت کی ہدایت

تل ابیب میں جاری بیان کے مطابق اسرائیلی وزیراعظم نے سوشل میڈیا پلیٹ فارم ایکس پر کہا کہ لبنان کی جانب سے بار بار مذاکرات کی اپیل موصول ہونے کے بعد کابینہ کو فوری بات چیت شروع کرنے کا حکم دیا گیا ہے۔ انہوں نے بتایا کہ مذاکرات کا بنیادی محور حزب اللہ کو غیر مسلح کرنا اور اسرائیل کے ساتھ امن پر مبنی تعلقات قائم کرنا ہوگا۔

دوسری جانب صدر جوزف عون نے تصدیق کی ہے کہ اسرائیل اور لبنان کے درمیان براہ راست مذاکرات کا آغاز ہو چکا ہے۔ انہوں نے کہا کہ موجودہ کشیدہ صورتحال کا واحد حل فوری جنگ بندی ہے اور اس حوالے سے مثبت ردعمل بھی سامنے آیا ہے۔

لبنانی صدر نے زور دیا کہ خطے میں پائیدار امن کے قیام کیلئے کشیدگی کا خاتمہ ناگزیر ہے۔ ان کا کہنا تھا کہ جنگ بندی دونوں ممالک کے درمیان مزید تصادم کو روکنے میں اہم کردار ادا کر سکتی ہے۔

ماہرین کے مطابق اسرائیل اور لبنان کے درمیان مذاکرات کا آغاز خطے میں جاری کشیدگی کم کرنے کی جانب اہم پیش رفت قرار دیا جا رہا ہے، تاہم حزب اللہ کے معاملے پر اختلافات مذاکرات کو پیچیدہ بنا سکتے ہیں۔