ایران مذاکرات پر امریکا پُراعتماد، اہداف کے حصول کیلئے مضبوط پوزیشن میں ہیں: جے ڈی وینس

واشنگٹن: امریکی نائب صدر جے ڈی وینس نے کہا ہے کہ امریکا ایران کے ساتھ جاری مذاکرات میں اپنے اہداف کے حصول کیلئے مضبوط پوزیشن میں موجود ہے اور دونوں ممالک کے درمیان ممکنہ معاہدہ امریکی عوام کیلئے بڑی کامیابی ثابت ہوسکتا ہے۔

فاکس نیوز کو دیے گئے ایک انٹرویو میں جے ڈی وینس نے کہا کہ صدر ڈونلڈ ٹرمپ کی انتظامیہ ایران کے ساتھ مذاکرات کے ذریعے اپنے اہم سفارتی اور سیکیورٹی مقاصد حاصل کرنے کیلئے اچھی پوزیشن میں ہے۔

انہوں نے کہا کہ ان کے خیال میں ایران موجودہ کشیدگی اور تنازع کو مزید طول نہیں دینا چاہتا کیونکہ یہ اس کے مفاد میں نہیں۔ نائب صدر کے مطابق ایرانی حکام مذاکرات کی میز پر واپس آ رہے ہیں اور سنجیدہ تجاویز پیش کر رہے ہیں، جن کا امریکا باریک بینی سے جائزہ لے گا اور ان کی تصدیق کرے گا۔

جے ڈی وینس کا کہنا تھا کہ اگر دونوں فریق کسی قابلِ قبول معاہدے تک پہنچ جاتے ہیں تو یہ نہ صرف خطے میں استحکام کیلئے اہم پیش رفت ہوگی بلکہ امریکی عوام کیلئے بھی ایک بڑی کامیابی تصور کی جائے گی۔

انہوں نے اس امید کا اظہار کیا کہ جاری سفارتی کوششیں مثبت نتائج دیں گی اور دونوں ممالک کے درمیان اہم معاملات پر پیش رفت ممکن ہو سکے گی۔