خیبر پختونخوا میں سول ججز کی تقرری کا امتحان، 1024 امیدواروں میں صرف 3 کامیاب

خیبر پختونخوا میں 105 سول ججز کی تقرری کے امتحان میں 1024 امیدواروں میں سے صرف 3 کامیاب ہوئے۔ بار کونسل نے نتائج پر تشویش کا اظہار کرتے ہوئے نوٹیفکیشن واپس لینے کا مطالبہ کردیا
پشاور: خیبر پختونخوا میں 105 سول ججز کی تقرری کے لیے خیبر پختونخوا پبلک سروس کمیشن کے تحت منعقدہ امتحان کے نتائج نے سب کو حیران کر دیا، 1024 امیدواروں میں سے صرف 3 امیدوار کامیاب قرار پائے۔
خیبر پختونخوا پبلک سروس کمیشن کے مطابق سول ججز کی بھرتی کے لیے مجموعی طور پر 3097 درخواستیں موصول ہوئی تھیں، جن میں سے 1024 امیدوار امتحان میں شریک ہوئے۔
کمیشن کے مطابق انگریزی (جنرل) اور انگریزی (مضمون) کے پرچوں میں تقریباً 85 فیصد امیدوار کامیابی حاصل نہ کر سکے، جبکہ جنرل نالج کے پرچے میں 68 فیصد امیدوار ناکام رہے۔
کامیاب امیدواروں کو دستاویزات جمع کرانے کی ہدایت
پبلک سروس کمیشن نے امتحان میں کامیاب ہونے والے تینوں امیدواروں کو ہدایت کی ہے کہ وہ مطلوبہ تصدیق شدہ دستاویزات 15 روز کے اندر کمیشن میں جمع کرائیں۔
کمیشن کے جاری کردہ نوٹیفکیشن کے مطابق کسی امیدوار کو اپنے نمبروں کی دوبارہ گنتی کرانے کی ضرورت ہو تو وہ مقررہ طریقہ کار کے تحت کمیشن کو درخواست جمع کرا سکتا ہے۔
خیبر پختونخوا بار کونسل کا نتائج پر اظہار تشویش
دوسری جانب خیبر پختونخوا بار کونسل نے سول ججز کے امتحانی نتائج پر تشویش کا اظہار کرتے ہوئے نتائج کا نوٹیفکیشن واپس لینے کا مطالبہ کیا ہے۔
بار کونسل کے مطابق نتائج نے سول ججوں کی بھرتی کے طریقہ کار اور امتحانی معیار پر سوالات اٹھا دیے ہیں۔ بار کونسل کا کہنا ہے کہ صوبے میں پہلے ہی ججوں کی کمی اور زیرِ التوا مقدمات کی بڑی تعداد موجود ہے، ایسے میں سول ججز کی تقرری کے عمل کو مؤثر بنانے کی ضرورت ہے۔
سول ججز کی بھرتی ہائی کورٹ کے ذریعے کرنے کا مطالبہ
خیبر پختونخوا بار کونسل نے مطالبہ کیا ہے کہ آئندہ سول ججز کی بھرتی پبلک سروس کمیشن کے بجائے ہائی کورٹ کے ذریعے کی جائے۔
بار کونسل نے چیف جسٹس سے بھی پبلک سروس کمیشن کے نتائج کے نوٹیفکیشن کا نوٹس لینے کا مطالبہ کیا ہے۔ بار کونسل کے مطابق ضروری قانونی اور انتظامی ترامیم کے بعد سول ججز کی بھرتی کا اختیار ہائی کورٹ کو دیا جانا چاہیے۔
امتحانی نتائج کے بعد اب سول ججز کی بھرتی کے طریقہ کار، امتحانی معیار اور عدالتی نظام میں ججز کی ضرورت کے حوالے سے بحث جاری ہے، جبکہ بار کونسل کے مطالبات پر متعلقہ حکام کی جانب سے آئندہ لائحہ عمل سامنے آنا باقی ہے۔
شائع ہوا: 1 اکتوبر، 2026 کو 07:30 AM
آخری تدوین: 1 اکتوبر، 2026



