خیبرپختونخوا میں امن کا قیام پہلی ترجیح، نیشنل ایکشن پلان پر مکمل عملدرآمد کا اعلان

پشاور: گورنر خیبرپختونخوا فیصل کریم کنڈی نے کہا ہے کہ صوبے میں امن کا قیام اولین ترجیح ہے، دہشت گردی کے خاتمے اور امن و امان کی صورتحال بہتر بنانے کے لیے تمام دستیاب صلاحیتیں بروئے کار لائی جائیں گی۔ انہوں نے واضح کیا کہ نیشنل ایکشن پلان پر مکمل عملدرآمد کیا جائے گا اور غیر قانونی اقدامات کرنے والوں کے خلاف کارروائی ہوگی۔

گورنر خیبرپختونخوا فیصل کریم کنڈی کی زیر صدارت 11 رکنی ایڈوائزری کونسل کا پہلا اجلاس منعقد ہوا، جس سے خطاب کرتے ہوئے انہوں نے کونسل کے ارکان کو مبارکباد دی اور کہا کہ وفاقی حکومت نے نظام کی بہتری کے لیے ان پر اعتماد کیا ہے، تاہم اس مقصد کے حصول میں کئی چیلنجز کا سامنا ہوگا۔

فیصل کریم کنڈی نے کہا کہ خیبرپختونخوا کے عوام نے دہشت گردی کی بھاری قیمت ادا کی ہے اور اب وقت آگیا ہے کہ صوبے کو امن کا گہوارہ بنایا جائے۔ ہماری جنگ دہشت گردی کے خلاف ہے، سب سے پہلے امن قائم کرنا ضروری ہے، اس کے بعد دیگر معاملات پر توجہ دی جاسکتی ہے۔

انہوں نے کہا کہ ریاست کا عزم خیبرپختونخوا میں امن یقینی بنانا اور عوام کو دہشت گردی سے نجات دلانا ہے۔ غیر معمولی اقدامات کا مقصد قانون کی عملداری قائم کرنا اور دہشت گردی کا خاتمہ ہے، تاہم تمام ریاستی اقدامات آئین اور قانون کے مطابق کیے جائیں گے۔

گورنر نے کرپشن کے خلاف زیرو ٹالرنس پالیسی اپنانے اور نیشنل ایکشن پلان پر مکمل عملدرآمد کو ترجیحات میں شامل قرار دیا۔ ان کا کہنا تھا کہ جو شخص غیر قانونی اقدام کرے گا، اس کے خلاف کارروائی ہوگی، جبکہ قانون کے دائرے میں رہنے والے ہر شخص کو مکمل تحفظ فراہم کیا جائے گا۔

فیصل کریم کنڈی نے کہا کہ خیبرپختونخوا قدرتی وسائل سے مالامال صوبہ ہے اور امن و امان کی صورتحال بہتر ہونے سے سیاحت کو فروغ ملے گا۔ صوبے کی ترقی اور خوشحالی کے لیے مشترکہ کوششیں ضروری ہیں، جبکہ محرومیوں کا شکار علاقوں پر ریاست کو خصوصی توجہ دینی چاہیے۔

انہوں نے نوجوانوں کو ملک کا مستقبل قرار دیتے ہوئے کہا کہ ریاست کی ذمہ داری ہے کہ انہیں تعلیم اور روزگار کے مواقع فراہم کرے۔ مشکلات ضرور ہیں، لیکن عزم ان مشکلات سے بڑا ہے۔ انہوں نے امید ظاہر کی کہ خیبرپختونخوا دوبارہ امن اور خوشحالی کی جانب بڑھے گا۔

گورنر خیبرپختونخوا نے مزید بتایا کہ کل ایپکس کمیٹی کا اجلاس ہوگا، جس میں صوبے کی امن و امان کی صورتحال اور متعلقہ امور پر پیشرفت کا جائزہ لیا جائے گا۔