لبنانی صدر جوزف عون کا ایران پر بڑا الزام، لبنان کو امریکا سے مذاکرات میں سودے بازی کا مہرہ قرار دے دیا

(بیروت) لبنان کے صدر جوزف عون نے ایران پر الزام عائد کیا ہے کہ وہ لبنان کو امریکا کے ساتھ اپنے مذاکراتی عمل میں بطور سودے بازی کے مہرے کے طور پر استعمال کر رہا ہے، جبکہ لبنانی عوام اس پالیسی کی بھاری قیمت ادا کر رہے ہیں۔

سی این این کو دیے گئے ایک انٹرویو میں صدر جوزف عون نے ایران اور اس کے حمایت یافتہ گروہوں پر تنقید کرتے ہوئے کہا کہ لبنان ایک خودمختار ملک ہے اور اسے کسی بھی علاقائی یا بین الاقوامی مفادات کے لیے استعمال نہیں کیا جانا چاہیے۔

انہوں نے ایران کے پاسداران انقلاب کا حوالہ دیتے ہوئے کہا، "یہ آپ کا ملک نہیں، یہ ہمارا ملک ہے۔" ان کا کہنا تھا کہ ایران لبنان کو امریکا کے ساتھ اپنے مذاکرات میں ایک سودے بازی کے آلے کے طور پر استعمال کر رہا ہے، جس کا خمیازہ لبنانی عوام کو بھگتنا پڑ رہا ہے۔

صدر عون نے کہا کہ ایران درحقیقت لبنان کی مدد نہیں کر رہا بلکہ لبنانی شہری دوسروں کے مفادات کی قیمت ادا کر رہے ہیں۔ انہوں نے واضح کیا کہ ان کی حکومت ملک کو مزید تنازعات اور جنگ سے بچانے کے لیے ہر ممکن قدم اٹھائے گی اور امن کے قیام کے لیے مذاکرات کے عمل کی حمایت جاری رکھے گی۔

اس موقع پر انہوں نے اسرائیل کو بھی مخاطب کرتے ہوئے کہا کہ صرف فوجی کارروائیوں سے پائیدار امن حاصل نہیں کیا جا سکتا۔ ان کے مطابق اگر اسرائیل حقیقی امن اور سلامتی چاہتا ہے تو اسے ایسے اقدامات کرنا ہوں گے جو سیاسی حل کی راہ ہموار کریں۔

جوزف عون نے حزب اللہ کے خلاف اسرائیلی فوجی حکمت عملی پر بھی تنقید کی اور کہا کہ تنظیم کے اثر و رسوخ سے نمٹنے کا مؤثر طریقہ یہ ہے کہ لبنانی حکومت کو اپنا کردار ادا کرنے کا موقع دیا جائے۔ ان کا کہنا تھا کہ اسرائیل پورے ملک کو تباہ تو کر سکتا ہے، لیکن اس طرح اپنے بنیادی مقاصد حاصل نہیں کر سکتا۔

لبنانی صدر کے یہ بیانات ایسے وقت میں سامنے آئے ہیں جب مشرقِ وسطیٰ میں کشیدگی برقرار ہے اور خطے میں مختلف سفارتی کوششیں جاری ہیں۔