وزیراعلیٰ بلوچستان سے نیکٹا نیشنل کوآرڈینیٹر میجر جنرل فیصل نصیر کی ملاقات

کوئٹہ: وزیراعلیٰ بلوچستان سرفراز بگٹی سے نیکٹا کے نیشنل کوآرڈینیٹر میجر جنرل فیصل نصیر نے ملاقات کی، جس میں صوبے کی مجموعی سکیورٹی صورتحال اور دہشت گردی کے خلاف جاری اقدامات کا جائزہ لیا گیا۔

جاری اعلامیے کے مطابق ملاقات کے دوران بلوچستان میں امن و امان کی مجموعی صورتحال پر تفصیلی تبادلہ خیال کیا گیا۔ اس موقع پر دہشت گردی کے خلاف اقدامات اور مختلف اداروں کے درمیان انٹیلی جنس کوآرڈینیشن کو مزید مؤثر بنانے کے امور بھی زیر بحث آئے۔

ملاقات میں بلوچستان میں پائیدار امن کے قیام کے لیے مربوط حکمت عملی اپنانے پر بھی غور کیا گیا۔ نیکٹا اور بلوچستان حکومت کے درمیان انسداد دہشت گردی کے شعبے میں تعاون کو مزید مؤثر بنانے اور قانون نافذ کرنے والے اداروں کی استعدادِ کار بڑھانے کے حوالے سے مختلف تجاویز پر بات چیت ہوئی۔

اعلامیے کے مطابق شرکا نے دہشت گردی کے تدارک کے لیے اداروں کے درمیان باہمی رابطہ کاری مزید بہتر بنانے پر اتفاق کیا۔ ملاقات میں اس امر پر بھی زور دیا گیا کہ امن و امان کے قیام کے لیے تمام متعلقہ اداروں کے درمیان مؤثر تعاون اور بروقت معلومات کا تبادلہ ضروری ہے۔

وزیراعلیٰ بلوچستان سرفراز بگٹی نے انسداد دہشت گردی کے لیے میجر جنرل فیصل نصیر کی خدمات کو سراہا اور امن کے قیام کے لیے مربوط کوششوں کی اہمیت پر زور دیا۔