لاہور میں سکوٹی سوار لڑکی پر تشدد کرنے والا ملزم گرفتار، مزنگ لنک روڈ پر راستہ روک کر تشدد کا الزام

لاہور: صوبائی دارالحکومت لاہور کے علاقے مزنگ میں سکوٹی پر سفر کرنے والی لڑکی کا راستہ روک کر مبینہ طور پر تشدد کرنے والے ملزم کو پولیس نے گرفتار کرلیا ہے۔ پولیس کے مطابق ملزم کی شناخت غلام مصطفیٰ کے نام سے ہوئی ہے، جو ضلع چنیوٹ کا رہائشی ہے۔

پولیس حکام کے مطابق ملزم نے مزنگ لنک روڈ پر موٹر سائیکل پر سوار لڑکی کو ٹکر مار کر زبردستی راستہ روکا۔ الزام ہے کہ اس کے بعد ملزم نے لڑکی کو موٹر سائیکل سے گرا دیا، تھپڑ مارے، بال نوچے اور تشدد کا نشانہ بنایا۔

پولیس کے مطابق تشدد کے نتیجے میں لڑکی کے چہرے اور ناک پر زخم آئے، جبکہ اس کے لیپ ٹاپ اور بیگ کو بھی نقصان پہنچا۔ ملزم پر مبینہ طور پر لڑکی کا موبائل فون اور لیپ ٹاپ چھیننے کی کوشش کرنے کا الزام بھی ہے۔

پولیس نے ملزم کو گرفتار کرکے مزید تفتیش شروع کردی ہے، جبکہ متاثرہ لڑکی کے والد کی مدعیت میں تھانہ مزنگ میں مقدمہ درج کرلیا گیا ہے۔

ڈی آئی جی آپریشنز کامران فیصل نے واقعے پر ردعمل دیتے ہوئے کہا کہ سرِراہ خواتین کا راستہ روکنا، انہیں ہراساں کرنا اور تشدد کا نشانہ بنانا ناقابلِ برداشت ہے۔

انہوں نے کہا کہ خواتین کو خوفزدہ کرنے والوں کے خلاف بلاامتیاز قانونی کارروائی کی جائے گی اور خواتین کے خلاف جرائم میں ملوث عناصر سے سختی سے نمٹا جائے گا۔

واقعے کے بعد پولیس کی جانب سے خواتین کے تحفظ اور عوامی مقامات پر ہراسانی کے واقعات کی روک تھام کے لیے قانونی کارروائی کی اہمیت پر زور دیا گیا ہے۔