خیبرپختونخوا میں سکیورٹی فورسز کا بڑا آپریشن، فتنہ الخوارج کے 8 دہشت گرد ہلاک

ڈیرہ اسماعیل خان: خیبرپختونخوا میں سکیورٹی فورسز کی دہشت گردوں کے خلاف کارروائیاں جاری ہیں، ڈیرہ اسماعیل خان میں انٹیلی جنس بیسڈ آپریشن کے دوران فتنہ الخوارج کے 8 دہشت گرد ہلاک ہوگئے، ہلاک ہونے والوں میں تین اہم سرغنہ بھی شامل ہیں۔

سکیورٹی ذرائع کے مطابق ڈیرہ اسماعیل خان میں دہشت گردوں کی موجودگی کی خفیہ اطلاع پر سکیورٹی فورسز نے انٹیلی جنس بیسڈ آپریشن کیا، جس کے دوران فتنہ الخوارج کے 8 دہشت گردوں کو ہلاک کردیا گیا۔

ذرائع کا کہنا ہے کہ کارروائی میں ہلاک ہونے والے دہشت گردوں میں تین اہم کمانڈر بھی شامل ہیں، جبکہ ان کے قبضے سے غیر ملکی کرنسی، بڑی تعداد میں اسلحہ اور گولہ بارود بھی برآمد کیا گیا ہے۔

سکیورٹی ذرائع کے مطابق عزمِ استحکام وژن کے تحت دہشت گردی کے مکمل خاتمے اور ملک میں پائیدار امن کے قیام کے لیے کارروائیاں جاری رہیں گی۔

دوسری جانب وزیراعظم شہباز شریف نے سکیورٹی فورسز کی بروقت اور مؤثر کارروائی کو سراہتے ہوئے کہا ہے کہ دہشت گردی کے خلاف جنگ میں پوری قوم سکیورٹی فورسز کے شانہ بشانہ کھڑی ہے۔

وزیراعظم نے اس عزم کا اظہار کیا کہ فتنہ الخوارج کے خلاف کارروائیاں دہشت گردی کے مکمل خاتمے تک جاری رہیں گی، کیونکہ ملک میں امن و استحکام کے لیے دہشت گردی کا مکمل خاتمہ ناگزیر ہے۔

وفاقی وزیر داخلہ محسن نقوی نے بھی ڈیرہ اسماعیل خان میں خوارج کے خلاف کامیاب آپریشن پر سکیورٹی فورسز کو خراج تحسین پیش کیا۔