امریکی رکن کانگریس الہان عمر پر سرکہ پھینکنے والے شخص کو 14 ماہ قید

مینیسوٹا: امریکی ریاست مینیسوٹا میں ڈیموکریٹ رکن کانگریس الہان عمر پر سرکہ پھینکنے والے شخص کو ایک سال دو ماہ قید کی سزا سنا دی گئی۔

رائٹرز کے مطابق انتھونی جیمز کازمیرزک نے مئی میں حملے کا جرم قبول کیا تھا۔ ملزم نے اعتراف کیا کہ اس نے الہان عمر کے ترقی پسند سیاسی خیالات سے اختلاف کی وجہ سے انہیں نشانہ بنایا۔ اسے منی ایپولس کی وفاقی عدالت نے 14 ماہ قید کی سزا سنائی۔

یہ واقعہ جنوری میں مینیسوٹا کے ایک ٹاؤن ہال اجلاس کے دوران پیش آیا، جہاں الہان عمر امیگریشن حکام کی کارروائیوں پر تنقید کر رہی تھیں۔

رائٹرز کے مطابق ملزم ہجوم میں سے اٹھا اور سرنج کے ذریعے الہان عمر پر سرکہ پھینک دیا۔ سکیورٹی گارڈ نے فوری طور پر اسے قابو کرلیا، جبکہ الہان عمر نے واقعے کے باوجود اپنی تقریر جاری رکھی۔

عدالت میں ملزم کے وکیل کے مطابق کازمیرزک نے الہان عمر سے معذرت بھی کی۔ تاہم اس کے خلاف ریاستی عدالت میں حملے اور تشدد کی دھمکیوں سے متعلق مزید مقدمات بھی زیرِ سماعت ہیں۔