آبنائے ہرمز پر ٹول ٹیکس ناقابل قبول، کسی ملک کو اجازت نہیں دی جا سکتی: مارکو روبیو

امریکی وزیر خارجہ مارکو روبیو نے واضح کیا ہے کہ آبنائے ہرمز ایک بین الاقوامی آبی گزرگاہ ہے اور کسی بھی ملک کو وہاں سے گزرنے والے جہازوں پر ٹول یا فیس عائد کرنے کا حق حاصل نہیں۔

ابوظہبی میں میڈیا سے گفتگو کرتے ہوئے مارکو روبیو نے کہا کہ بین الاقوامی قانون کے تحت آبنائے ہرمز عالمی تجارت کے لیے ایک اہم گزرگاہ ہے، اس لیے کسی ایک ملک کی جانب سے اس پر ٹیکس یا ٹول وصول کرنے کی اجازت نہیں دی جا سکتی۔

انہوں نے کہا کہ اس معاملے پر خطے کے ممالک کے درمیان وسیع اتفاق رائے موجود ہے اور کسی کو اس حوالے سے قائل کرنے کی ضرورت نہیں۔ امریکی وزیر خارجہ کے مطابق خطے میں استحکام کے لیے ضروری ہے کہ ایران کے حمایت یافتہ گروہوں کی جانب سے عراق سے میزائل اور ڈرون حملے بند ہوں، کیونکہ ایسے اقدامات تنازع کے مکمل خاتمے میں رکاوٹ ہیں۔

مارکو روبیو نے مزید کہا کہ یہ معاملہ آئندہ مذاکرات میں بھی زیر بحث آئے گا۔ ان کا کہنا تھا کہ اگر ایران انقلابی طرزِ سیاست کے بجائے ایک معمول کی ریاست کے طور پر کردار ادا کرنے کا فیصلہ کرے تو اس کے لیے ترقی اور اقتصادی مواقع کے وسیع امکانات موجود ہیں۔

امریکی وزیر خارجہ نے منگل کے روز متحدہ عرب امارات سے اپنے خلیجی دورے کا آغاز کیا ہے، جس کے دوران وہ کویت اور بحرین کا بھی دورہ کریں گے۔ مبصرین کے مطابق یہ دورہ خطے کی سیکیورٹی، ایران سے متعلق پالیسی اور سمندری تجارت کے تحفظ جیسے اہم امور پر مرکوز ہے۔